Tuesday, December 09, 2008

MAR-KURIA (15)

Parhorja

Porhanger/Pengantar Jemaat, manguluhon pangidangion

Sanggah na idilo ahu ijia gabe Parhorja, ai ma gabe Sintua i GKPS Bandung, lanjar ahu ma homa itodoh gabe Porhanger. Ijia Porhanger do goran ni na manguluhon horja pangidangion i Kuria.

Ijia, mangihutkon na dob ihasomalhon i Kuria ni halak Simalungun, hira wakil ni Pandita do Porhanger mambobahon ganup horja pangidangion i Kuria, dihut ma age pangidangion parduiton ni Kuria, ronsi administrasi nidokan. Sahalak do Pandita na mangidangi hu piga-piga Kuria halani lang piga ope Pandita. Ai ma ase anggo dong 10 Kuria ‘juma tanganan’-ni, ra do pitah padalankon pangidangion Horja Banggal Na Pansing pakon Pandidion Na Pansing hansa ase roh Pandita hu sada Kuria. Porhanger ma hira ‘tadingan’ ni Pandita manguluhon horja pangidangion i Kuria. Hira ganup do horja pangidangion ni Pandita boi ihorjahon Porhanger sobali pangidangion sakramen.

Pdt. A.H.P. Girsang ma ijia Panditanami i Bandung, ai ma Pandita ni HKBPS na gabe Pandita Tentara i Bandung. Ia do ijia na gogoh mangojur janah mambobahon halak Simalungun ase mambahen partonggoan i Bandung, dobni mambahen parmingguan, dobni gabe sada Kuria i GKPS (iresmihon 10 Mei 1964, lape gok satahun dob dear panriahan pasal panjaeon ni HKBPS hun HKBP janah irik iubah goran HKBPS gabe GKPS).

Halani ai, bani mungkahni hira na mangurupi horja ni Pandita on do hansa horjaku na gabe Porhanger on. Ai ma ase lang mintor borat huahapkon.

Tapi sonin ijia marpiga-piga dokah martugas Pandita on hu Sulawesi Selatan (mangirikkon odoran ni Tentara na itugashon hujai), gok bani Porhanger ma horja manguluhon pangidangion i parmingguan na baru pinungkah in. Porhanger ma age na mambobahon sermon ni Parhorja.

Napaboratkon horja manguluhon in ijia, ai ma halani na baru-baru do ganup Parhorja. Piga-piga do hansa homa na dob martongah-jabu, dihut ma ijai ahu, hansi pe anggo umurhu lape gok 27 tahun. Legan ni ai parana pe. Tongon dong ma deba parana in na laho Sarjana. Dob ai, hira na ielek-elek do ase ra jadi Parhorja. Ai ma ase maningon elek janah golgol do pagolpahon ase ulang lupa Parhorja in mambuat horin ni bei.

Na pahappungkon horja manguluhon pangidangion in, ijia hira ganup do Parhorja marsibahen sidalian ni bei ase ulang itodoh gabe Porhanger. Gariada dong do humbani Parhorja in na manghabujurhon mambuat horinni asal ma ulang isuruh jadi Pohanger.

Mintor dong do homa ijia piga-piga humbani Parhorja in na manghabujurhon horja pangidangion hansi pe anggo bani mungkahni na ielek-elek hinan do ia ase ra jadi Parhorja.

Humbani bagei ni horja haporhangeron, tang siboratan huahap ijia ai ma mambobahon sermon ni Parhorja. Piga-piga Parhorja on mahasiswa do, deba in na laho tammat ma. Gakni halani na so tarhorom do, hotop sai tarboan parsahapan dompak parbualan ilmiah. Paksa ma asok, lang pala nagorahon, naboan use parsahapan on mulak hu bani turpuk na isermonhon.

Horja na borat tumang do homa horja na siap minggu maningon pasirsirhon diri mangidangi i parmingguan, na songon tagam-tagam manggassihkon parhorin na lang roh mambuat horinni. Anggo patumpu galangan do, boi do na onjapkon namaposo atap na matua na so Parhorja. Anggo mambobahon doding do, sai dong do tong hasoman Parhorja na ra mambuat horin ni Parhorja na so roh in. Anggo maragenda, piga-piga ma hansa na ra manggassihkon pori lang roh siparhorin hinan. Tapi anggo manggassihkon marambilan, hira lang dong na ra. Ai ma ase Porhanger maningon sirsir siap minggu manggassihkon Parhorja na lang roh mambuat horin ni in.

Hira Porhanger do homa ijia manguluhon horja anggo ipamasa horja-horja, songon Pesta Natal. Ai ijia lape masa na pajongjong Panitia Pesta.

Pori pe dong Panitia, songon sanggah laho manresmihon GKPS Bandung ijia, hira manghobaskon ianan pakon sipanganon siinumon do tang horjani. Porhanger do anggo na dodas marpiga-piga hali hu Jakarta, mangarahkon par Jakarta ase roh sanggah peresmian, sonai manjumpahi Ephorus GKPS pakon odoranni (ai ma Pdt. J. Purbasiboro) na sanggah mar-Sidang Raya DGI (1964) i Jakarta. Sanggah pembukaan ni Sidang Raya in do hujumpahi Ephorus on. Ai ma ase dihut do ahu hu Senayan ijia mambogei pidato ni Presiden Soekarno na manghatahon: Jesus adalah gembala yang amat baik.

Sanggah na hujumpahi in Ephorus, sobali mansahapkon horja peresmian ni GKPS Bandung, hupatangkas do homa pasal kohoman ni Ephorus in sanggah na hu Bandung in holi sidea. Nini Ephorus mambalosi:”Anggo roh Pandita barang Ephorus hu Kuria, i rumah ni Porhanger do da marborngin.” Sengeh do namin ia manghatahon ai. Tapi huidah lang songon na marhuria, songon hata sintongon-tongon do. Hupartongon-tongon ma hata ni ai. Ningku ma marbalos:”Dear ma ai Mangkela. I rumahta ma ham marborngin.” Ai marmangkela do tuturhu bani Pdt. J. Purbasiboro in, ai botou ni Mangkelanami do Inang-i-rumahni.

Hupatugah ma parsahapannami nongkan hu bani Inang-i-rumah. Halani dong do kamar etek-etek na palopah dingding pakon kamarnami, ai ma ipatorsa Inang-i-rumah ianan ni Mangkela Ephorus in. Sirsir do homa parhombar-jabunami paijamkon tilamni, gendo songon na suman podoman ni tamueinami on.

Ari Saptu malebod paima Pesta Peresmian ni GKPS Bandung in, tongon ma roh Mangkela Ephorus on hu rumahnami. Sonin turun ia hun mobil ni sidea, ialo-alo hanami ma hu laman. Ia do hansa turun. Anggo Guru Rudolf Purba, Majelis Gereja, odoranni Ephorus on, soh do i mobil. Nini Ephorus on ma hu bennami:”Nai ma da. Ulang pala sonaha uhurmu age pe lang saud ahu marborngin i rumahmu. Ai ipasirsir par Jakarta do hape Penginapannami i Lembang. Pajumpah i parpestaan ma hita patar, tene, “ nini manjabat-tangani hanami. Dob ai iolos ma use mulak hu mobil ni sidea on.

Ningku ma marbalos:”Anggo sonai ma sidearan, dear Mangkela. Nai ge lang hu rumah hita lobei?”

Nini ma hun atas mobil ni sidea on:”Tarimakasih ma. Na dob das ma nuan ahu ai hu rumah, atene. Lang pala singgah, da. Laho golap ma ari, lang hubotoh atap na daohnari ope Lembang.”

Sonai ma hansa saud ni parroh ni Mangkela Ephorus on hu rumahnami. Ai pe sibar alaman do hansa. Anggo rumah ni Porhanger nidokanni sanggah huparsahapkon i Jakarta, lang saud idogei, ulang antara iparborngini.

Lang pala etek uhurnami age pe lang saud marborngin Mangkela Ephorus on i rumahnami. Gariada nihurnami do: diatei ma lang saud. Ai etek do rumah na sinewanami on i Cisitu. In homa, na laho dodas do hanami panorang Pesta Peresmian ni Kuria in, ai dihut do hanami padidihon niombahnami sipahi-tolu, na margoran Ichtus Pujiontama, sanggah Pesta in. Hansa, na husosalhon ijia, mase ma pala ihatahon Mangkela Ephorus on hasomalan na maningon i rumah ni Porhanger do parbornginan ni Pandita na roh manohu Kuria. Lang pala namin ihatahon hasomalan na i huta ai anggo hira lang tardalankon be sonai i kota. Ahu pe, ma saluju tu do maruhur. Mase ma homa lang hupaduahali manungkun ijia, atap hasomalan ni Kuria na i huta ai do iboan hu Bandung, hape ijia hundong do Anggota ni GKPS par Jakarta na boi manamuei Ephorus on marborngin i hotel na dong i Bandung (atap Lembang).

Lang pala namin manghorhon dong na hait ibagas uhur na so saud Mangkela Ephorus on marborngin i rumahnami. Pori sai na dingat pe in janah natarsingati sonari, na paroh tawa do hansa in, halani na sompat ai marpala-pala hanami pasirsirhon kamar parbornginan ni Ephorus on ijia, hape lang saud.

In homa, parroh ni Ephorus on hu Bandung sonai homa mangidah partorsani Pesta Peresmian in, paroh malas ni uhur do ganupan in, gabe lang sai na paanu-anu pori pe sai dong na hurang. Humbahat do homa ijia par Jakarta roh, dihut ma deba ai halani pangurupion ni Abang Saralen. Sonai pakon pangarahkon ni Abang/Lawei J.D. Sinaga SH (santorap mar-Abang do tuturhu bani halani Tondong-ni-tondong (Tondong ni Garingging) do sidea; santorap homa mar-Lawei do, ai tubuh ni boru Sigumonrong do Amboru namarombahsi). Janah par Jakarta na roh in do mambahen na humbuei dapot hanami dana sanggah pesta in.

Tar opat tahun do hansa hujolom horja haporhangeron on, ai pe tar dua-satongah tahun do hansa dob resmi jongjong GKPS Bandung. Jadi lape sompat huahapkon sonaha borat ni horja in. Ai bani bona ni tahun 1967, ai ma sanggah Minggu dob Tahun Baru, martading hata ma hanami hu bani Kuria GKPS Bandung, ai mulak ma hanami hu Simalungun, dob hutammatkon kuliahku i Fakultas Hukum Universitas Padjadjaran bani ujung ni tahun 1966. Huondoskon ma horja haporhangeron in hu bani St. Poltak Girsang.

Tapi dob hutadingkon horja haporhangeron in, pindah janah tong Sintua hu GKPS Jl. Sudirman, Pematang Siantar, pindah use hu GKPS Sambu Baru, Medan, anjaha dob tambah parbinotohanku pasal haporhangeron marhitei na paidah-idah horja ni Porhanger, sonai ronsi na pabogei-bogei barita pasal horja haporhangeron sadokah pardalanan ni Ambilan Na Madear i Simalungun, lambin huarusi ma sonaha borat ni horja ni Porhanger. Ai ma ase longang do uhurhu mase ahu ijia itodoh, hape damok tumang do hansa habotohon pakon pangarusionku pasal horja haporhangeron. Tapi irik ma homa na lambin longang uhurhu mase bani panorang ipudini in, bani piga-piga Kuria ni GKPS, lambin iparsurai halak horja haporhangeron na borat in.

Mangihutkon barita na hupabogei-bogei dob mulak hanami hu Simalungun, sapari, gan, Guru tammatan Sekolah Guru Sending do itodoh gabe Porhanger. Ai palobei parsikolahan do ipajongjong Badan Sending, dob ai pe ase ipajongjong Kuria. Guru Sending na itongos parsikolahan ai ma lanjar Parhorja ni Kuria mambobahon parmingguan. Dob ai anggo jumpah ma adanganni boi ipajongjong Kuria i huta ianan ni parsikolahan in, Guru Sending nongkan ma Porhanger. Anggo dong do piga-piga Guru Sending na marhorja i parsikolahan sending in, sahalak humbani sidea in ma itodoh gabe Porhanger, na manguluhon horja pangidangion i Kuria. Songon i Kuria Pamatangraya ma pori, dokah do Guru Jason Saragih ondi Porhanger anjaha ia do homa Guru Kopala i Sikolah Sending Pamatangraya. Sikolah Guru Sending tammatan Depok do anggo Guru Jason Saragih in. Sidea na dua ma pakon Guru J. Wismar Saragih, tammatan Laguboti, guru halak Simalungun na parlobei. (Ipudi ni ari, dob marpiga-piga dokah mandalankon Guru Sending, dob ai sompat jadi Pangulu Balei (tarmados songon Sekretarus Daerah sisonari), dobni gabe Pandita ma use Guru J. Wismar Saragih in dob idalani Sikolah Pandita i Sipoholon. Anggo Guru Jason Saragih nongkan, Guru i Pematangraya do torus ipongkutkon ronsi matua ia).

Dob dong pagori ni Kuria na boi arahkonon gabe Parhorja, ipabangkit Kuria ma sidea in gabe hasoman sahorja ni Guru nongkan, deba ma ai ipabangkit gabe Sintua, debanari gabe Kasbestur. Ai ma ase humbani sapari, lima masam do goranan ni Parhorja ni Kuria (atap na gamot ni Kuria), ai ma Pandita, Porhanger, Guru, Sintua pakon Kasbestur.

Lambin rarat ma Ambilan Na Madear hu sab huta i Simalungun. Lambin marjongjongan ma Kuria, lang be maningon palobei pajongjong parsikolahan. Sadalan hujin, lang be maningon Guru Kuria (tammatan Sikolah Sending) na boi pabangkiton gabe Porhanger, tapi boi ma age Sintua, tarlobih ma ai anggo i Kuria in lang dong Guru Kuria.

Sobali goranan ni Porhorja na lima in, ipudi ni ari dong ma homa use na margoran Evangelis pakon Bibelvrouw.

Anggo Evangelis, bani mungkahni hira horja na niampeihon do hansa in hu bani Guru Sending atap hu bani Pandita. Guru atap Pandita do ‘jabatan’ atap tohonanni, evangelis horjani, manrohi sab huta padaskon Ambilan Na Madear. Dong do Evangelis in na isuruh hu sada atap piga-piga huta. Dong do na isuruh hu sab huta. Songon Pdt. J. Wismar Saragih ondi ma porini, sonin tammat ia Sikolah Pandita janah dob ipabangkit jadi Pandita, horjani na parlobei ai ma gabe Pandita Evangelis. Sanggah ia ma bahat huta ni halak Simalungun na irohi laho padashon Ambilan Na Madear. Dob ai pe ase ibahen ia Pandita Resort (Pandita ni piga-piga Kuria bani sada Resort).

Ipudian ni ari use lang be pitah na tammat Sikolah Guru Sending atap Sikolah Pandita hansa na isuruh gabe Evangelis, tapi dihut ma humbani Sintua atap humbani Pagori ni Kuria.

Anggo Bibelvrow, pardongni ipungkah marhitei na padongkon Sikolah Bibelvrow. Na tammat hun Sikolah Bibelvrow in ma ipabangkit gabe Bibelvrow (ipudian ni ari igoran ma sidea in Penginjil Wanita). Ibahen ma horja ni sidea in padashon Ambilan Na Madear hu bani partumpuan ni parinangon i Kuria-Kuria (na sa Resort atap na piga-piga Resort). Lanjar sidea ma mangurupi sonaha ase lambin manggoluh tuppuan ni parinangon sisahali saminggu i Kuria-Kuria.

Ipudi ni ari use, ai ma dob itombei Tata Gereja pakon Peraturan Rumah Tangga GKPS (tahun 1974), ipatorsa ma goranan ni Parhorja ni Kuria i GKPS. Humbuei do na mubah, hansi pe ibagas pandalanhonon hira lang pala bahat na mubah.

Goran Guru (Kuria) lang dong be. Ai lang be dong Sikolah Guru Sending harohan ni Guru in hinan. Halani ai, ganup Parhorja na margoran Guru hinan, iubah ma goranni gabe Sintua.

Goran Kasbestur pe lang dong be. Itombei ma goran na baru, ai ma Syamas, goran na ibuat humbani panggoranion ni Parhorja i Kuria na parlobei, songon na tarsurat bani Padan Na Baru. Sahali lima tahun do ibahen pemilihan Syamas. Anggo lang tarpilih be, maronti ma ia humbani horja Syamas. Lang songon Sintua; ai anggo Sintua, sonin ipabangkit ia jadi Sintua, torus ma ia Sintua.

Goran Evangelis, sonai homa goran Bibelvrouw, iubah ma gabe Penginjil (hansi pe anggo horja ni Penginjil naboru (Penginjil Wanita) hira dos do songon horja ni Bibelvrouw ondi). Pimpinan Pusat GKPS do na pabangkitkon Penginjil, sonai age na manontuhon hu Resort ja ia mangidangi.

Lang be homa dong Parhorja na margoran Porhanger. Tapi dong ma na margoran Ketua ni Majelis Jemaat na ipilih janah ipabangkit Majelis Jemaat sahali lima tahun. Lanjar Ketua in ma na manguluhon horja pangidangion ni Parhorja i Kuria. Songon goran ni ai do horjani. Sanggah marrapot Majelis Jemaat, ia ma (Ketua) mambobahon rapot. Sanggah mandalankon horja pangidangion romban hu bani haputusan ni rapot, ia do homa manguluhon panghorjahonon (Pengantar Jemaat).

Sadalan hu bani parmubah ni goranan ni Parhorja in, mubah ma homa utusan ni Parhorja hu Synode Bolon. Mangihutkon Tata Gereja pakon Peraturan Rumah Tangga na baru (1974), Perutusan Resort ma ibahen goranni, ai ma napinilih ni Synode Resort humbani Sintua atap Syamas na dong i Kuria-Kuria sa Resort in. Lang be songon sapariondi, dong Utusan Porhanger, dong Utusan Guru, dong Utusan Sintua, dong Utusan Kasbestur.

Ai ma ase dob lambin hubotoh sonin ma bahat janah borat ni horja na appei hu bani Porhanger naijia, Ketua lanjar Pengantar Jemaat goranni use ipudian ni ari, lambin longang do uhurhu mase ahu isuruh jadi Porhanger ijia; longang do ahu mase ongga janah boi ahu Porhanger ijia.

Halani ai ma homa ase lang be pag ahu mansurahon jadi Porhanger. Porini pe bani tahun 1995 ondi lang saud ahu tarpilih jadi Ketua (lanjar Pengantar Jemaat) i GKPS Sambu Baru, lang pala mahua uhurhu. Ai na so pag do ahu manjua pangindoan ni piga-piga hasoman Parhorja ijia. Ninuhur ni piga-piga hasoman sahorja on ijia, anggo ahu tarpilih, gendo boi ai dalan mangintopi parbolah-bolahan na masa i tongah-tongah ni Kuria ijia. Hupaihut ma hata ni hasoman on. Hape namin, pori saud ahu tarpilih, na maningon ma hutadingkon horjaku i Jakarta, ai ijia gatian ma ahu ‘marjuma-modom’ i Jakarta halani dong na manaraya ahu mangurupi horjani ijai. Age horja (Wakil Sekjen) i DPP HKTI pe maningon hutallushon ma pori saud ahu tarpilih. Ai ma ase ningku do ibagas uhurhu, tuani ma lang tarpilih ahu. Na papusokkon uhurhu ijia, ai ma paidah-idah na dob sonin do hape bagas ni parbolah-bolahan naijia ia. Ai domma hape dong na mangatur ase dos bahat ni petek (suara) na pamonanghon na sambolah, pataluhon na sambolah nari. Tongon ma, sonin ipamasa pemilihan, dos do parbagi ni petek sanggah pamilihan Ketua pakon pamilihan Wakil Ketua, ronsi pamilihan Sekretaris age Bendahara. Pitah sada petek do homa tong na pamonangkon na saud tarpilih in. Jadi, ijia sedo maila ahu halani lang tarpilih, tapi maila halani domma hape sonin parahni parbolah-bolahan in. Soidaon do hape na palobei martonggo paima ipamasa pemilihan. Ai age pe hata ni tonggo ase iparuhuri Naibata parrapot in mamilih romban hu bani harosuh ni Naibata, tapi hape ase saud do na pinadankon ni samah Parhorja sanggah masa ‘kampanye’.

Porini pe dear do na mansurahon ase ipadihut Naibata diri gabe Parhorja i KuriaNi, tapi ulang ma namin pala marsurai gabe Parhorja. Ulang namin pala ma mar-kampanye itongah-tongah ni Kuria in laho pasaudkon sura-sura na madear nongkan. Apala dearan do naondoskon sura-sura na madear nongkan hu bani Naibata simada Kuria in, ase harosuhNi ma na saud. Ai pori pe marhitei kampanye nidokan boi nabahen bahat Pagori ni Kuria (ronsi Parhorjani) na mangharosuhkon diri, sisoya-soya do ai bendiri age bani Kuria in anggo seng marosuh Naibata.

Wednesday, December 03, 2008

MAR-KURIA (14)

Parhorja

Pangidangion i parmingguan pakon partonggoan

Humbani hadakdanakonku nari domma hupaidah-idah siap marminggu ahu, masam ni horja pangidangion ni Parhorja i parmingguan. Sonai homa anggo dihut ahu hu partonggoan, hupaidah-idah ma homa horja pangidangion i partonggoan. Sompat do huagan hinan pitah na hupaidah-idah in hansa horja pangidangion ni Parhorja, ai ma: dong na mambobahon doding, dong paragenda, dong parambilan, dong na patumpu galangan. Age pe hira pagassih do Parhorja in manjampung horja pangidangion in, tapi hupardiatei ma homa, dong do Parhorja na gatian horjani mambobahon doding, dong na gati horjani maragenda, dong do homa na patumpu galangan do hansa horjani, dong do homa lang ongga ihorjahon ganup horja pangidangion sobali marambilan.

Songon Bapanami ondi ma porini, girah do ia Sintua, tapi sadokah ahu mardingat, humbani bagei ni horja pangidangion nongkan, pitah marambilan i Parmingguan do hansa ihorjahon, ai pe marsasahali do, sanggah tudu horinni marbagian. Lang hubotoh atap naijia, paima mardingat ahu, atap na ongga do ihorjahon horinni mambobahon doding, maragenda atap patumpu galangan, sanggah poso ope Bapanami in. Ai dob mardingat ahu, madonok ma umurni 60 tahun.

Girah do homa huinteihon, piga-piga Parhorja hunhotop manjolom horja paragendaon. Dong do homa Parhorja na hunhotop atap gatian ‘sibasa doding’, lang ongga taridah maragenda atap pe marambilan i parmingguan. Dong do homa Parhorja na hunhotop, gariada maningit siap minggu tene, horjani patumpu galangan, lang ongga ‘sibasa doding’, lang ongga maragenda, lang ongga marambilan i parmingguan.

Paidah-idah in, girah do dapot uhurhu, hansi pe dos do samah Parhorja, lang hape dos horja ni sidea in. Dong do tongon na boi manjampung horja naijahai pe horja pangidangion in. Tapi lang piga ai. Bahatan do Parhorja na manghorjahon horja pangidangion na hira-hira tarhorjahonsi. Anggo mandoding pe lang sai ibotoh, surut ma ia humbani horja mambobahon doding. Anggo gamang pe ia jongjong manjolom agenda i lobei ni Kuria, surut ma ia humbani horja maragenda.

Girah do homa dapot uhurhu, sedo na urah hape horja pangidangion in. Paidah-idah in ma gakni deba mambahen lang pala husurahon hinan gabe Parhorja.

Ai ma ase sonin jumpah panorangni tardilo ahu jadi Parhorja, ai ma sanggah mamungkahkon parjongjong ni GKPS Bandung ijia, hubotoh do sedo na hampung horja in. Halani ai ma gakni ase marpala-pala ahu manghabujurhon pandiloon in, dihut ma ai marhitei na marpala-pala mangguru hu bani Panditanami ijia, ai ma Pandita A.H.P. Girsang ondi, Pandita ni GKPS na gabe Pandita Tentara (TNI AD) i Bandung, baik pe ai marhitei sermon atap pe marhitei parbual-bualan, marlajar marhitei na mambasai buku-buku na mardomu hu bani horja pangidangion i Kuria ronsi na mardomu hu bani Podah Parambilanon (Homiletika), ronsi na mambahen ‘evaluasi’ pasal panghorjahonon irik salosei nahorjahon horja pangidangion in. Sipata marhitei na manungkun huan-huan samah Parhorja, tapi gatian ma manungkun bani Inang-i-rumahku.

Ipudi ni ari use, dob hupaihut-ihut marorganisasi politik janah ipadihut bani bagei ni penataran kader nidokan, bahat do dapot ahu hunjin habotohon na boi parujahonon dompak horja pangidangion i Kuria, porini ma ai songon habotohon pasal ‘psikologi massa’ nidokan.

Hansi pe hugorani nongkan na bahat ahu mangguru, bahat mambasa, tapi girah do homa dapot uhurhu, na so boi marpangajaman diri bani habotohon naniguruhon in. Gariada tarpantang do anggo napangajamkon habotohon naginuruhon in laho mangidangi i Kuria. Ai ra do ipabador Simada horja in diri. Tapi na maningon do mangajamkon pangurupion humbani Naibata Simada horja in, mangarapkon gogoh ronsi hapentaron humbani Naibata, ai namangidangiSi do homa horja pangidangion in.

Sonai ma ijia, dob piga-piga dokah ipungkahkon hanami mangadonghon parmingguan ni halak Simalungun i Bandung, dong ma ijia sahalak hasoman Parhorja, mahasiswa ope songon ahu, tapi laho tammat ma. Santorap roh anjaha dihut ma ia marsermon, parsermonannami Parhorja. Huhatahon santorap, ai lang gati ia roh marsermon. Gakni na sihol buatonni ma horinni marambilan. Malas ma uhurhu halani idingat janah iharinggaskon do mambuat horinni. Halani tudu ijia Panditanami, ai ma Pandita Tentara nongkan, martugas hu Sulawesi Selatan, gabe ahu ma mambobahon sermonnami.
Sanggah sermon on domma namin songon marpanungkun ahu ibagas uhurhu, na tongon ni uhur ni hasomannami on do na marsermon on. Ai hira lang pala sai igambirhon hansi pe pagansih hanami na marsermon on marsibere hatoranganni. Ai ijia, nabere do panorang hu bani parsermon marsibere hatoranganni, lang pitah manungkun hansa. Ai hira mados do hanami Parhorja ijia, lang dong age sahalak na dob Parhorja hinan, anjaha bahatan do Parhorja in na mahasiswa. Ai ma ase ra do sermonnami ijia songon debat pasal ‘Filsafat’, ai bahat do ijia na domma ‘tingkat doktoral’ nidokan. Gakni lang tarhorom bei, marsermon do ningon hape ‘marfilsafat’ do use, samah marsujihon na dob pinarlajaranni bei.

Hupardiatei hasomanku na laho mambuat horinni marambilan on, hatorangan aha pe lang dong humbani, sungkun-sungkun pe lang dong. Talup-talup songon na itoruh ni akalni do ganup nasinahapkonnami na marsermon on. Sanggah hupatangkas atap domma sirsir ia mambuat horinni marambilan bani minggu na roh, iundukkon do dear.

Tiba ma panorang minggu, saud do tongon roh ia, anjaha domma sirsir naidah na laho ibuat do tongon horinni marambilan.

Tapi sonin tiba panorangni marambilan ia, hira na ipabador Naibata do ia i loulouan parmingguannami on, ai hira lang boi mungkab pamanganni mambere hatorangan ni ambilan na dob binasahonni hun langgatan. Na tarluarhonsi marulak-ulak pitah on do hansa:”Nasiam hasoman sahaposayaon.....”; iulakkon use “Nasiam hasoman sahaporsayaon....” Pori pe dong iluarhon piga-piga kababah pasal turpuk ni ambilan nabinasani nongkan, tapi mintor sonto do, hira lang boi mungkab pamanganni. Ai ma gakni mambahen iulakkon use manluarhon:”Nasiam hasoman sahaporsayaon....”.

Saud do namin iluarhon piga-piga kababah ambilan on, tapi lang piga dokah, ihatahon ma “Amen”, dob ai iujungi ma marhitei tonggo.

Mangidah na masa bani hasomanhin ma mambahen girah dapot uhurhu na so boi do happung uhur laho manghorjahon horja pangidangion i Kuria. Lang boi napangajamkon hinapandei diri (ninuhur ben domma diri mahasiswa atap Sarjana).

Lang pitah halani mangidah namasa in tumang. Tapi humbani panghorjahononku sandiri pe, ongga do marpiga-piga hali maningit tarbador ahu sanggah maragenda, halani lepak mambasa, sipata halani lepak mambuka alaman ni agenda na laho basahonon, paksa ma mangungkabi alaman ni agenda lobei diri, hira songon na lang napasirsir hinan. Sapari onggo hutangar marsiengen-engenan samah Parhorja, nini:”Magou pusuk”; ai gakni ijia pusuk (ipah) do ipassolotkon bani alaman ni agendani, ase urah ia mangungkab. Magou honsi pusuk in, sosak ma ia. Anggo masa ma sonin, mintor huidophon ma uhurhu, na maransahtu do ahu manghorjahon horja pangidangion in, atap huakuhon ma ibagas uhurhu na hupangajamkon habotohonku, atap hupangajamkon na dob somal ma huhorjahon horja in, gabe lupa marunduk ni uhur hu bani Naibata, lupa mangajamkon gogoh pakon habotohon humbani Naibata.

Ongga do homa, sonin turun ahu hun langgatan dob padas ambilan, husolsoli diriku na hurang marondos janah mangalop gogoh humbani Naibata, atap halani hupangajamkon habotohonku marsahap-sahap padashon ambilan, atap hupangajamkon na dob bahat ‘buku tafsir’ hubasa. Ai mintor huahapkon do na lumei hansa ambilan na hupadas ai, na mambogeisi lang dapotan age aha hunjin.

Hunjin ma homa hubotoh, lang sukkup pitah sanggah mamungkah jadi Parhorja hansa diri mangindo pangurupion humbani Naibata. Tapi siap laho manghorjahon sada horja pangidangion do. Ai ma ase, pori na marambilan ondi, pori pe ongga ma naambilankon turpuk in, lang boi ai napahamot laho mangambilankon use, tapi na maningon do naulakkon ‘nasermonhon’, janah marhiteihon sonai ma dapotan na baru diri humbani Hata in, ai maningon ‘ambilan na baru’ do tong Hata in, pori domma piga-piga hali iambilankon.

Ibagas na pasirsirhon diri laho manghorjahon horja pangidangion, gati do huusihi na huidah iabakkon Lawei Rasiman Saragih ondi, na maling-maling sorani uman songon na marambilan in, sanggah sahalaksi i kamarni parsirsirhon diri ia anggo laho marambilan bani minggu na laho roh.

Sonai ma homa gati hubahen. Dob hulajou huluarhon songon na laho ambilanhononku in, sipata dapot uhurhu ma na maningon paubahon do ‘kalimat’ni, ase das songon na nisura ni ambilan ai, atap ase boi palgei huluarhon. Atap na maningon paubahon do batur ni siluarhonon, ai ma anggo soppat nabahen hinan baturni songon marsahap Indonesia, hape na laho marsahap Simalungun do padason ambilan on. Ai sisurahonon do tipak panluarhonon sanggah marambilan, ulang namin soppat luar na ‘igaor-gaor-sibakkon’. Ibarat ni na manuratkon paper atap skripsi sanggah kuliah sapariondi, maningon torsa ni Bahasa Indonesia-ni, lang bulih bahasa gado-gado barang bahasa pasaran nidokan. Samintolah ma padaskon ambilan.

Sanggah parsirsirhon horja paragendaon pe hotop do palobei hubasa gomos-gomos sahalak ahu i rumahnami, songon na maragenda in. Sobali hubasa, huparimbagaskon homa na hubasa in, ase jumpah ahu sonaha pambasa na dearhonsi.

Halani sapari siparagendo do homa parsirsirhon doding, sipata ra do irik hudodingkon doding na dob pinilih in, pairik pakon mambasa agenda. Sanggah sonin ma hotop dapot uhurhu na maningon pilihon do doding na sadalan pakon agenda, atap anggo maningon ai ma dodingni, maningon pilihon ma ‘agenda’ na domu hu bani doding ai. Ase songon na marsibalos-balosan ‘agenda’-ni pakon dodingni, in homa maningon romban hu bani goran ni minggu.

Dob pangkei hupasirsir diringku, marondos ma ahu ase Ipargogohi ahu.

Ai ma ase lambin dokahni janah lambin bueini masam ni horja pangidangion na huhorjahon i Kuria, lambin huparhatongon do na pitah halani ipargogohi Naibata do ahu mambahen boi huhorjahon in. Gariada, anggo boi mardalan dear na huhorjahon in, hotop do longang janah sungkun-sungkun ahu ibagas uhurhu, hunja do roh habotohonkin, mase boi huhorjahon in. Anjaha hubalosi sandiri ma ibagas uhurhu, halani pangurupion ni Naibata tumang do in, pitah halani idop ni uhurNi do, ra Ia mamakei ahu irik ipargogohi.