MAR-KURIA (17): PENGURUS RESORT

Parlobeini

Tahun 2008, marayak Pesta Pardingatan Partubuh ni Tuhan Jesus – na lambin somal sondahan on igoran hita Pesta Natal – dihut do hanami (ahu pakon Inang-i-rumah) bani odoran ni na manaruhkon bangkei ni Mangkela Pam Bungaran ondi na laho suanhonon i panimbunan i pudi ni rumahni i Sarimatondang 1). Paima isuankon, hu gareja GKPS Sarimatondang do lobei iboan. Ai Sintua do ia sanggah goluhni i GKPS Sarimatondang. Domma gabe hasomalan ai i GKPS, janah domma homa sonai iaturhon bagi Peraturan ni GKPS, anggo marujung goluh Pandita atap Penginjil atap Sintua (ai ma Parhorja na martohonan), paima isuankon hu panimbunan, iboan do lobei hu gareja anjaha i gareja do ipadalan paragendaon.

Paima paragendaon i gareja in, ipadas Pimpinan Majelis Jemaat GKPS Sarimatondang ma barita ni Mangkela na marujung goluh in sadokah Parhorja ni Kuria ia. Hun ganjang do barita na pinadas ni Pimpinan Majelis Jemaat on. Ai talup-talup lang pitah na dob isuratkon hansa ibasahon, tapi dihut homa nanipaidah-idahni sanggah goluh ni Mangkela on. Bahatan ma homa ai ninididahni dob bebas tugas (pensiun) Mangkela on, na sai roh do tong sermon, tapi sonin salosei sermon mintor mulak hu rumah, lang ra ia dihut marbual-bual pakon samah Parhorja dob salpu sermon ronsi bagas borngin. Anggo pasal horja ni Mangkela on sadokah Parhorja, hira na mambasa na tarsurat ma hansa ia, lang pala bahat itambahkon bunga-bunga ni sahap. Lanjar hira na iakui do homa, ia nabinasahon ni on hira tuturian mando bani, lape dihut ia mangidah sandiri. Dapot uhur do ai, halani Mangkela on marujung goluh bani umur pa-94-hon. Ia ma sada na dihut mamungkahkon jongjong Kuria Sarimatondang, ijia HKBPS Sarimatondang do goranni, ipudiniari gabe GKPS Sarimatondang. Hape Pimpinan Majelis Jemaat na mambasahon barita on tar humposo ope.

Dob salosei horja na manuanhon bangkei ni Mangkela na sayur matua on, ipasirsir hasuhuton do sipanganon i rumah ni sidea na i Sarimatondang in. Dob salpu na mangan on, husompathon do marbuali pakon Lawei Pa Eben (Siadari). Sanggah na marbuali on hanami, tarsingat do ia na humbani do bahatan barita ni Mangkela na binasahon nongkan i gareja. Ai humbani mungkahni jongjong Kuria HKBPS Sarimatondang, dihut ma homa ia Parhorja. Halani ai ma homa mambahen girah ma dob hutandai Pa Eben on. Ai sanggah Ketua Umum Seksi Pemuda GKPS ahu, ia do Ketua Pemuda GKPS Resort Sarimatondang. Ongga do homa rap hanami Anggota Sinode Bolon GKPS. Ia utusan ni Resort Sarimatondang, ahu utusan ni Resort nami hun Medan.

Humbani parbualannami pasal barita ni Mangkela nabinasahon nongkan i gareja, gabe taringat ma ahu na roh naboron hata ni Pengantar Jemaat nami i GKPS Sambu Baru ase husuratkon tar aha ma deba na huhorjahon sadokah Parhorja ni Kuria ahu. Bani panorang marayak gok umurhu 70 tahun ma roh pangindoan ni on, sanggah marbuali hanami i alaman ni gareja GKPS Sambu Baru. Sonin ipadas hata ni on, mintor huundukkon do laho mansuhuni. Ai mintor dapot uhurhu do, gendo dong do holi basahonon ni Majelis Jemaat i gareja anggo tiba ma panorangku. Ai ahu pe ongga do sosak sanggah mateian abang. Sahali ma ai sanggah parujung goluh ni Abang Saridin ondi. Sanggah martambar hu Jerman do ia marujung goluh, tapi iboan do bangkeini hu Medan. Sahali nari ai ma sanggah marujung goluh Abang Saralen ondi i Jakarta, tudu sanggah ‘marjuma modom’ ahu i Jakarta. Sosak do pangahap, ai maningon dong basaonkon ipudi ni sidea in sonin tiba panorangni iboan hu alaman (horja maralaman nidokan) paima iboan hu panimbunan. Paksa ma itorihi hanami lobei arsip ni riwayat hidupni, hansi pe namin dulmit do hansa isuratkon ijin, ai hu parhorjaanni do parayakan ni riwayat hidup natinadingkon ni on. Tapi sanggah na mateian botou (ai ma Kak Sinta) ondi, balik ni ai ma homa. Ai pitah mambatur (editing) nari mando ahu. Ai bani hatuaon ni Kaka ondi, domma hape iparhalilian manuratkon barita pargoluhonni, jojor, dihut pakon hajongjongonni ibagas pardiha-dihaon. Ai ipajojor do ise Inangtuani, ise Oppungni, ise Bapani ronsi sanina ni Bapani, panogolan ni ise ia, sonaha parsaud ni langkahni marhajabuan, pnl. Ai ma ase mamuliti nari mando humbani buku tulis panuratan ni on, naija na porlu padason i loulouan horja sayur matuani.

Ai ma ase sanggah na roh pangindoan ni Pengantar Jemaatnami pasal riwahat hidup on, mintor huundukkon do. Hansi pe podas huundukkon, tapi sonin hupungkah laho mansuhuni, hubotoh ma na maningon do huungkab piga-piga Agenda (Buku Harian) pakon Susukkara partingkianku, ronsi piga-piga arsip ni Risalah atap Notulen ni rapot-rapot i Kuria atap i Resort. Ai lang sai hudingat be ganupan na hudalani in sanggah Parhorja ni Kuria ondi ahu. Pori pe hudingat, hira marlopot-lopot mando. Gakni domma sogop bakku biak ni na dob matua, lambin hurang ma pardingatni.

Sanggah na mansuhuni pangindoan ni Pengantar Jemaat nami nongkan ma mambahen na hudingat use, na ongga do ahu Pengurus Resort GKPS mamungkah humbani tahun 1975 das hu bani tahun 1995 (20 tahun)

Dob husuratkon in mansuhuni pangindoan ni Pengantar Jemaat nongkan, sihol tarsingatanhu ma homa pasal in bani ‘MAR-KURIA’ on. Hupadihut ma homa na dapot uhurhu pasal kepengurusan ni Resort na legannari i GKPS. Ai ma na huinteihon sanggah Anggota Majelis Gereja GKPS ahu. Dong do marpiga-piga torap dihut ahu padalanhon horja pemeriksaan kuangan hu Pengurus Resort pakon Kuria. Tongon lang tarpareksa Majelis Gereja ganup. Pitah piga-piga ma na itodoh hanami na sahira sample nidokan, laho padalankon horja pengawasan ni Majelis Gereja GKPS hu ganup pangkorjahonon ni kepengurusan i GKPS, humbani Pimpinan Pusat, Pengurus Resort, das hu Majelis Jemaat. Ai bani Tata Gereja pakon Peraturan Rumah Tangga GKPS (1974), hu ganup kepengurusan do padalanon ni Majelis Gereja horja pengawasan. Ipudi ni ari (tahun 2000), pitah hu bani kepengurusan ni Pimpinan Pusat mando dong pengawasan ni Majelis Gereja, lang dihut be dompak kepengurusan ni hasadaon sa Resort pakon kepengurusan ni Kuria. Ibarat ni pemeriksaan keuangan ni Pemerintah ni negara ondi, pitah pemeriksaan internal (songon BPKP pakon Inspektorat) mando ipahamot GKPS, lang dong be pemeriksaan external (songon BPK) hu Resort pakon Kuria.

Ia hutarsingati janah husuratkon pe sonari pasal na ongga ahu Pengurus Resort in, sai daoh ma humbani na paroh gijang ni uhur. Ai sanggah hubasai use Agenda partingkianhin, ahu pe longang do ibagas uhurhu, mase ma pala sonin banggal ni idop ni uhur Tuhan hu bangku, ra Ia manaraya ahu marhorja i pohon anggurNi, i KuriaNi. Jadi, ia hutarsingati pe in sonari, hira na mamilang-milangi idop ni uhur ni Naibata do.

Aha do Pengurus Resort, aha horjani

Dob dong Tata Gereja pakon Peraturan Rumah Tangga GKPS (1974), tangkas ma iaturhon, tolu do goranan Kepengurusan ni GKPS. Ai ma Majelis Jemaat (kepengurusan ni Kuria), Pengurus Resort (kepengurusan ni hasadaon sa resort ni piga-piga Kuria), Pimpinan Pusat (kepengurusan ni hasadaon sa GKPS ni Kuria-Kuria). Kepengurusan ni Kuria parlobei husobut, halani domma lambin roh tangkasni pangarusion pasal aha do Kuria, aha homa naginoran GKPS. Ai anggo panggoranion kepengurusan bani Tata Gereja tahun 1974 in, palobei Pimpinan Pusat do igoran, dob ai pe ase Pengurus Resort, janah tang parpudi do isobut Majelis Jemaat. Hira na mar-tingkat ‘hunnatas hu toruh’. Hape namin mamungkah humbani Tata Gereja tahun 1974 in domma dong pangarusion i GKPS, ia persekutuan GKPS terwujud dalam bentuk Jemaat-Jemaat, beberapa Jemaat bergabung dalam Resort 2). Janah bani Peraturan Rumah Tangga pe palobei Kuria (Jemaat) pakon kepengurusanni do iatur, dobsi ai pe baru aturan pasal Resort pakon kepengurusan sa Resort. Ipudi ni aturan pasal Resort pe ase iatur pasal Synode Bolon pakon Pimpinan Pusat GKPS.

Lima halak do Pengurus Resort, ai ma Ketua, Sekretaris, Bendahara pakon 2 Anggota. Pandita Resort do Ketua (karena jabatan). Ia Pandita Resort in sedo natinodoh (dipanggil?) ni Kuria atap Resort, tapi na sinuruh (ditugaskan?) ni Pimpinan Pusat do. Pengurus Resort na opatnari ipilih Synode Resort anjaha 5 tahun do periode ni napinilih in 3).

Sanggah ipungkah padalanhon aturan na tarsurat bani Tata Gereja pakon Peraturan Rumah Tangga na baru in (bona ni periode tahun 1975-1980), tar tolu tahun ope dob marianan hanami i Medan, markuria i GKPS Sambu Baru. Ijia sa-Resort ope pakon GKPS Hang Tuah (pamatang Resort), GKPS Padangbulan, GKPS Jl Binjei Km-7, GKPS Binjai. Ai ma na margoran Resort Polonia, Medan. Bani Synode Resort Polonia 1975 in ma ipilih Synode Resort Pengurus Resort periode 1975-1980. Ketua ai ma Pdt. H. M. Girsang, Pandita Resort (karena jabatan). Sekretaris ai ma St. Dj. M. Purba. Bendahara ai ma St. Ishak Damanik. Dua halak Anggota, ai ma ahu pakon St. Brigjen (Pens) L. R. Munthe.

Bani periode 1980-1985 pe dihut pe ahu ipilih Synode Resort. Tapi das hu bani tahun 1982 do hansa dihut ahu bani Pengurus Resort Polonia. Ai tahun 1982 ibagi dua ma Resort Polonia, ai ma marhitei na manombei Resort na baru, na igoran Resort Medan Barat. GKPS Sambu Baru ma pamatang ni Resort na baru in. Sa Resort ma in pakon GKPS Jl Binjai Km-7, GKPS Binjai, GKPS Helvetia pakon GKPS Gloria. Bani Resort Medan Barat na baru jongjong in pe dihut do ahu ipilih Synode Resort, ai ma gabe Sekretaris Pengurus Resort. Anjaha iulakkon use ipilih bani periode 1985-1990, sonai age bani periode 1990-1995.

Lang piga dokah dob tarpilih hanami gabe Pengurus Resort Polonia periode 1975-1980, marrapot ma hanami. Husuratkon do bani bani Agenda (Buku Harian) partingkianhu (22/4/75), ia ranggian ni rapot na parlobei in, ai ma: Pasal haputusan ni Synode Resort (deba ma ai pengesahan notulen pakon pasal Pembangunan Rumah Resort); pasal parbagi ni horja ni Pengurus Resort; pasal Pembimbing ni Seksi-Seksi; pnl. Anjaha husuratkon do homa parsahapan ibagas rapot in ronsi haputusan ni rapot, hansi pe bona-bona ni do hansa, lang jojor songon notulen. Deba ma ai, ia horja ni Sekretaris lang pitah ‘setia usaha’, tapi dihut do pakon bidang organisasi; Bendahara do manjamah parduiton ni Resort ronsi mangatur lanjar mangawasi parduiton ni Kuria; itodoh ma homa humbani Pengurus Resort in ise-ise gabe Pembimbing ni Seksi, anjaha ahu do itodoh gabe Pembimbing ni Seksi Pemuda GKPS Resort pakon Seksi Wanita GKPS Resort; lanjar iputushon ma homa bagi ni horja mambahen panohuon hu Kuria-Kuria; anjaha bahenon ma sahali tolu bulan rapat hadomuan ni Pengurus Resort pakon Pimpinan Majelis Jemaat.

Humbani rapot nami na parlobei in, talup-talup mintor dapot uhurnami do ia tang horja ni Pengurus Resort ai ma mambobahon Kuria-Kuria in lambin orod marhasadaon, sisada parsaoran i bagas houhouan GKPS. Jadi, Pengurus Resort sedo ‘atasan’ (atap kepala)ni kepengurusan ni Kuria. Mambobahon marhasadaon do. Dihut ma pagolpahon na lepak atap.na hurang torsa mandalanhon aturan na dong (aturan na isuratkon) atap aturan halani domma ihasomalhon (aturan na lang isuratkon) i GKPS.

Mangihutkon pardingatku, torsa do kepengurusan Resort ipadalan hanami bani periode 1975-1980 in. Ketuanami ijia Pandita na pandei marorganisasi do. Botoh do ia manguluhon ase riap marhorja ganup Pengurus Resort in. Age pe namin botoh do ia pasal horja hasekretarison, lang ijampung horja ni Sekretaris. Ipahamot do Sekretaris manghorjahon horja ni Sekretaris. Sonai do homa horja na mardomu bani parduiton, ipahamot do Bendahara mangkorjahon hansi pe hotopan tiba Pandita Resort ipadalan Kuria duit na marujuan hu Resort pakon na marujuan hu Pimpinan Pusat (Kantor Pusat).

Sekretarisnami pe botoh do bani horja hasekretarison. Bendaharanami pe jimot janah jippo do pangkorjahononni, lang pitah ‘manjolom’ duit ni Resort tumang horjani, tapi pembukuan-ni pe torsa do. Hanami na dua Anggota ni Pengurus Resort pe ibotoh hanami do horjanami. Ai ma hasoman manriah pakon mambere pikirian sanggah rapot atap sanggah marbuali samah Pengurus Resort, mangkorjahon horja naniondoskon ni rapot bennami, dihut ma ijai pori iondoskon bennami horja manrohi Kuria mamboan goran ni Pengurus Resort.

Ijia ma hupala-palai manrohi Kuria-Kuria na sa Resort in. Sobali marhitei na dihut bani sermon hadomuan (sa Resort) si sahali sabulan na pagassih Kuria na manjabui, marhitei na dihut bani rapat koordinasi pakon Pimpinan Majelis Jemaat si sahali tolu bulan. Sipata harorohku hu Kuria ai ma manrohi rapat-rapat na niadongkon ni Kuria, atap na rapat Kuria (Sidang Jemaat) ma ai, atap rapat ni Majelis Jemaat ma ai, atap rapat ni Panitia Pembangunan. Sipata ra do homa harorohku hu Kuria anggo isaraya marambilan.

Age pe nongkan huhatahon na marpala-pala ahu manrohi Kuria-Kuria sadokah na Anggota Pengurus Resort Polonia ahu ijia, nihurhu lape gok hulahoi horja kepengurusan in. Hassa, ijia lang pala sai marhutuk halak. Gakni iarusi halak do, pori humurang pe hulahoi horja kepengurusan Resort in, sedo halani lasseihu, tapi halani na humbahat do jabatan hujolom sanggah ia. Ai sobali Anggota DPRD Sumatera Utara, ahu do homa Ketua ni DPD HKTI Sumatera Utara. Dihut do homa ahu bani kepengurusan ni DPD GOLKAR Sumatera Utara. Sanggah ijia, ahu pe Ketua Umum ni Pemuda GKPS (das hu bani tahun 1978). Dihut do homa ahu Anggota Majelis Gereja GKPS.

Lang pala ongga namin hubahen jabatan-jabatan in sidalian mambahen humurang pangkorjahononku dompak horja Pengurus Resort. Ai hubotoh do tangkas, marhitei jabatan-jabatan in do mambahen dong bakku fasilitas nidokan laho mangkorjahon horja i Kuria. Jadi, sedo halani jabatan-jabatan nongkan mambahen hurang pangkorjahonon i Kuria. Tapi halani na hurang pandei diri do mambagi panorang.

Ipudi ni ari, dob itodoh ahu gabe Sekretaris Pengurus Resort GKPS Medan Barat, hupala-palai do mangkorjahon horja hasekretarison, dihut ma ijai mambahen tipak mar-organisasi. Gariada hupala-palai do manlobei ibagas mangkorjahon horja hasekretarison ase ulang soppat ijampung Pandita Resortnami. In homa, Pandita Resortnami pe ihargahon do Sekretarisni, lang ra ia sihap manjampung, legan ma anggo dong mangolos-olos.

Bani horja mambobahon Kuria, marpala-pala ma homa hanami manjuljul Parhorja ni Kuria-Kuria in ase ulang marnasoh manambah habotohon pasal horja i Kuria. Dihut ma age habotohon marhorja marondolan hu bani ranggian ni horja (rencana kerja) tahunan na palobei iriahkon siap bona ni tahun, mambahen evaluasi irik mambahen laporan pangkorjahonon (laporan pertanggungjawaban) siap ujung ni tahun.

Ijia, somal do dong penataran hu bani Parhorja. Dong do in na niadongkon ni Kuria. Dong do homa penataran sa Resort naniadongkon ni Pengurus Resort. Tapi sobali marhitei penataran nidokan, dihut do homa marhitei usihan. Songon na mambahen Laporan (Tahunan) Pertanggungjawaban ma pori. Ipala-palai hanami do ase Laporan ni Pengurus Resort lang pitah mambaritahon aha na masa pakon aha nahinorjahon, tapi pajojorhon na masa pakon nanihorjahon padalanhon rencana kerja na niranggihon hinan do. Napatorang ma homa aha mambahen saud tarhorjahon, aha mambahen lang saud tarhorjahon na dob iranggihon hinan. Maralatan hu bani rencana kerja do ipadas laporan, ase goranon ia laporan pertanggungjawaban ni kepengurusan. Dob masa ijia na mar-komputer, huparlajari ma homa manambahkon bani laporan on piga-piga statistik ronsi grafik.

Hira bahatan do marhitei na mambahen usihan in mangkorhon lambin roh torsani Laporan Pertanggungjawaban ni Kuria-Kuria. Hinorhon ni ai ma homa gabe lambin ibotoh Kuria in marhorja sadalan hu bani naniranggihon ni Kuria (Rencana Kerja Jemaat), lang be asal horja-horja tumang. Gabe roh urahni ma homa hanami patumpuhon laporan-laporan ni Kuria in, mambatur in hu bagas Laporan (Tahunan) ni Resort.

Mamilih Pengurus Resort

Nongkan nahatahon do na bijak do Pandita Resort na pahamot Sekretaris mangkorjahon horja hasekretarison, na pahamot Bendahara mangkorjahon horja na mardomu hu bani parduiton, dihut ma ijai manjolom duit na dong i kepengurusan Resort. Marhiteihon na sonai, gabe tongon ma na dong do labani ibahen pemilihan Pengurus Resort, marsibuat nolihni napinilih in mangkorjahon horja ni Pengurus Resort.

Tapi lang jumpah sonai bakku sanggah Ketua DPD HKTI ahu dua periode i Medan naijia (1974-1979; 1979-1984). Ai hira ahu do use Sekretaris (anjaha Ketua). Ai hotopan do ahu mambahen surat-surat, mambahen Risalah ni rapotnami, mambahen Laporan Pertanggungjawaban. Manekennari mando Sekretaris. Anggo na maneken ai, hupalobei pe tong Sekretaris. Dob iteken Sekretaris pe ase huteken, hassi pe ahu do mangkorjahon.

Bani mungkahni, hupagolpa do namin tong ase ihorjahon horja hasekretarisonni. Nihurhu hinan halani lasseini do atap halani rayohni mambahen tarpaima-ima ahu bani nanihorjahonni. Dobni lambin hupaidah-idah ma, pori saud pe ihorjahon, lape tipak pangkorjahononni. Paksa ma palobei huparpadear (koreksi), hupaulak bani ase ipadear. Dob piga-piha hali sonai, ngayotan ma ahu pahamotkonsi. Dobni huhorjahon sandiri ma horja hasekretarison. Ai pori lalab na anju-anju, na paima, ra do lang saud horja. Ai tudu do hape lang dong niappulukanni.

Lang nabotoh ise hutukon. Ai ijia, na manriah do piga-piga organisasi tani (ormas tani nidokan) pajongjonghon HKTI, dalan pasadahon ganup petani, ase ulang be ipaturut partai-partai marsibahen ormas tani ni bei laho pamonanghon partai ni bei sanggah pemilu atap odihonkon mar-demonstrasi, hape sedo pamonangkon petani. Kiat laho padomuhon riah on, lanjar ibahen ma homa domu ni riah, ase humbani ormas tani na mabagei-bagei in ma ibahen harohan ni pengurus ni HKTI sipajongjongon in. Palobei itontuhon ma humbani ormas tani ja na gabe Ketua, humbani ormas tani ja na gabe Sekretaris, sonai ma homa age Bendahara pakon goranan ni kepengurusan na legannari ai. Halani hira banggalan do ijia RTI (ormas tani ni SOKSI), humbani RTI ma na gabe Ketua. Ahu ma itodoh RTI gabe Ketua on. Humbani ormas tani na legannari ma na gabe Sekretaris.

Anggo bani mungkahni jongjong namin, na tarpatongah do Sekretaris on. Tapi halani pindah ia hu Jakarta (jadi Anggota DPR RI), ibere ormas tani-ni ma panggasihni na so tarpatongah (bani horja hasekretarison). Biak ‘Ketua’ hinan do gakni ia, hape ibaen gabe Sekretaris. Balik ni ai ma gakni ahu. Biak Sekretaris do namin, hape iappeihon jabatan Ketua. Ai ma mambahen na boi nahuayob horja hasekretarison ai.

Bani na mamilih kepengurusan ni Resort GKPS ijia, age ronsi sonari, lang pala namin dong aturan na maningon humbani Kuria na palegan-legan pilihon Pengurus Resort (sobali Ketua, ai ma Pandita karena jabatan). Tapi, hassi pe lang dong iaturhon sonai, ipudi ni ari hira dong ibagas pingkiran ni par Synode Resort ase ibagihon gelah jabatan-jabatan kepengurusan Resort in hu bani Kuria-Kuria. Anggo tarpilih Sekretaris hun sada Kuria, ulang hun Kuria in be ipilih na gabe Bendahara, tapi hun Kuria na legannari ma. Sonai ma homa age na dua nari (Anggota) Pengurus Resort.

Huhatahon i pudi ni ari do dong pingkiran na sonai ai, halani bani tahun 1975 ondi, humbani 4 hanami Pengurus Resort ninipilih ni Synode Resort, pitah ahu do na hun GKPS Sambu Baru. Na tolu nari hun GKPS Hang Tuah do, hassi pe dong do namin 5 Kuria na marhasadaon sa Resort Polonia. Ai ma ase ijia, halakni (na patut boi araphonon mangkorjahon horja Pengurus Resort) do ipilih par Synode Resort. Ai anggo Kuria do ibahen alatan, lang namin mintor hun Kuria Sambu Baru ipilih, ai parpudi do jongjong Kuria Sambu Baru, daoh do lobeian Kuria Binjai, atap Jl Binjai Km-7.

Pangkorhon ni pingkiran ase dong Pengurus Resort hun tiap Kuria, gabe lang be habotohon (atap ‘biak’) ni halakni na gabe partimbangan ni par Synode laho mamilih. Na iporluhon ai ma ase humbani 4 Kuria harohan ni na opat Pengurus Resort sipilihon ai. Habotohon (atap ‘biak’) ni halakni lang dihut be gabe partimbangan. Talup-talup dong pingkiran na boi do holi iparlajari bei manghorjahon horjani anggo domma appei jabatan. Atap, talup-talup dong pingkiran (atap haporsayaon?), ‘haganup do tarhorjahon ahu marhiteihon Ia na margogohi ahu’ (Pilipi 4,13).

Bani na 13 tahun kepengurusan Resort Barat na hudalani, ongga do itaron hanami Pengurus Resort pangkorhon ni pamilihan na palobeihon harohan ni sipilihon in hun tiap Kuria. Ai ongga do ipilih Anggota Pengurus Resort na hurang tumang habotohonni pasal aturan i GKPS, gabe lang tarpahamot hanami ia mamboan goran ni Resort manohu hu Kuria. Rusak diri lepak holi parpatorangni age pambobahonni. Ongga do homa tarpilih Bendahara na hurang jimot (atap hurang mangarusi horja pembukuan?). Gabe paksa ma naurupi patorsahon pembukuanni sonai age laporan tahunan ni parduitonni.

I Resort na legannari pe ongga jumpah ahu sonai. Sanggah padalanhon pemeriksaan keuangan hanami (Tim ni Majelis Gereja) hu Resort, ongga do jumpah hanami Bendahara Resort na lang boi mambalosi sungkun-sungkunnami sadiha sisa kas ni parduiton ni Pengurus Resort sanggah parrohnami on. Pondok do hansa balosni. “Pandita do na pabotoh-botoh ai,” nini. Sanggah ipareksa hanami pembukuanni, tong homa lang tarpatorangsi. Dobni Pandita Resort ma use patorangkon. Habotohan ma bennami na Pandita Resort do hape manjampung ganup horja ni Pengurus Resort, pitah goranai do hansa hape dong Sekretaris, dong Bendahara, tapi Pandita do manjampung (atap manrobut?) haganup horja ni Pengurus Resort in . Tapi ijia lang sai tarjijiki hanami be, atap halani na hurangan horja do Pandita Resort on gabe ijampung ganup, atap na so dong do niappulukan ni Sekretaris atap Bendahara napinilih ni Synode Resort ni sidea in. Anggo pori itulimati, ra do gakni nabotoh, sedo halani na so dong niappulukan ni na tarpilih in. Ai humbahat do sidea in humbani Guru-guru ni Sikolah (SD atap SMP). Jadi, boi do halani na so marsipahamotan romban hu bani jabatan kepengurusan ni bei. Ra do homa halani na lang sai iparayak na tarpilih on mangkabujurhon horja na niarapkon ni pamilih humbani. Talup-talup na pinarayakni ai ma hasangapon. Ai sangap ma nihurni anggo domma Pengurus Resort. Lupa ia na boi do balik ni ai jumpahsi, ai ma anggo lang ihabujurhon horjani. Ai ra do gabe iengen-engen halak use, “Soidaon Pengurus Resort, hape....”

Sobali mangarapkon ase marsihabujurhon jabatanni bei namin Pengurus Resort in, siaraphonon do homa ase lambin ibotoh par Synode Resort na mamilih in aha do horja ni Pengurus Resort. Ase lambin ibotoh ise ma halakni na patut pilihonni gabe Pengurus Resort, na boi araphonon habotohonni boi iparujahon Kuria-Kuria na sa Resort in. Ulang ma namin raus hassa pamilihonkon in. Ulang asal ipilih tumang.

Na mararti do ai, na porlu do marnunut ipagolpa ganup Parhorja ni Kuria in. Sobali marhitei bagei ni horja pembinaan hu bani Parhorja (sapari sompat do somal igoran penataran), ra dear homa marnunut ipagolpa marhitei na patorangkon sanggah sermon atap sanggah ambilan, ia tudu boi marpardomuan nanisermonhon on pakon ‘pamilihan’ atap ‘pandiloon’ Porlu marnunut ipagolpa. Lang pitah sanggah marayak pamilihonkon tumang. Tapi marnunut humbani sada panorang hu panorang na mangihut. Ai marnunut do pagassih soluk Parhorja in humbani sada generasi hu bani generasi na mangihut..Songon i Kuria nami ma pori, domma matua bei hanami Parhorja sapariondi. Tongon dong pe Parhorja na ongga rap sahorja pakon hanami halani marsiposoan. Tapi bahatan ma Parhorja sonari na anggota ni Pemuda GKPS ope sanggah panorangnami ijia Parhorja. Ai ma ase ongga do huhatahon sanggah ipindo ahu manluar bani tumpuan Tahun Baru ni Parhorja, marpanorang bei do hita Parhorja on. Na laho jumpah do holi panorangni maningon marsaran. Ai ma ase sanggah dong panorang, ihabujurhon bei horja na ondos banta bei.

Marhitei na marnunut ipagolpa, gendo lambin roh pangkei ni bei Parhorja manimbangi ise ma sipilihon ia tiba ma masani pamilihonkon.

Tarlobih bani panorang parpudi on. Ai songon na dong naidah na marlumba sonaha ase ia ipilih. Lang nabotoh atap na hadalitan do ai humbani sistem pemilihan na masa i negara on. Marsipajuntul dirini caleg-caleg nidokan, gendo saud ipilih halak. Marsipajongjong baliho ni bei, maradu sibanggalan. Longang do tongon simbuei paidah-idah in. Tapi sibar longang do hansa. Pori na sungkun ise ma pilihonni, lalab do lape dong todohonni. Ai hira lang dong na mambere hatorangan gendo dong habotohon bani simbuei sonaha do patutni manimbangi ise sipilihon. Pori pe dong na mar-kampanye, hotopan do padaskon ojur-ojur do hansa ‘ase diha-dihata pilih hita’, ‘ase Simalungun ma ipilih, tanda ni na Simalungun do hita’, ‘parhutata on ma pilih hita’, pnl. Anggo i gareja atap i loulouan ni na mar-kebaktian isahapkon kampanye ni on, ihatahon ma ase martonggo hita laho mamilih. Ija ma lang lambin roh longangni jolma manangar kampanye na sonin. Ai na mardiha-diha do ganup samah Simalungun, gariada hu bani na so Simalungun pe boi do dong pardiha-dihaon. Halani ai hanar do diha-diha na gabe calon, lang nabotoh ise pilihon. Pori Simalungun ma ningon pilihon ni halak Simalungun, hanar do homa calon halak Simalungun, tarlobih na mambahen Daerah Simalungun Dapem (Daerah Pemilihan)-ni. Ise ma sidea in pilihon?

Tarjalo uhur do ai anggo marsibahen kampanye ni bei calon Anggota DPRD/DPR in. Ai sobali halani sangap do tongon anggo saud do ia gabe Anggota DPRD/DPR, sondahan on daoh do humbahat duit (honrarium/gaji) araphonon anggo saud tarpilih. Pasal na boi atap lang tarhorjahonsi horja ni Anggota DPRD/DPR, marguru ibagas ma holi ai.

Tapi anggo mar-kampanye ma homa ase ipilih par Synode Resort ia gabe Pengurus Resort, mahol do arusan aha ma gakni deba siayakonni. Ai lang na hadalitan do hansa ai. Ai pori saud ia tarpilih, paling-paling ma na boi araphononni ai ma ase marsangap Naibata marhiteihon ni horjani. Anggo ai do araphononni, tonggohon ma gelah gendo harosuh ni Naibata ma na saud, pahamot ma gelah Naibata marparmaloi Parhorja na sa Resort in mamilih hasoman sahorjaNi.

Balik ni ai ma homa. Anggo domma natonggohon, domma itonggohon par Synode Resort in, hape diri do ipilih, nahabujurhon ma horja in. Ulang homa itulak hita panodoh ni Naibata marhitei Kuria-Ni.

Catatan:

1) Pam Bungaran Saragih marujung goluh 18 Desember 2008.

2) Pasal 8 pakon Pasal 9 Tata Gereja GKPS (ipungkah ipadalan 1975). Bani Rancangan Tata Gereja napinadas ni Pimpinan Pusat pakon Majelis Gereja hu Synode Bolon 2008, iubah ma in gabe: Persekutuan GKPS terwujud dalam Jemaat-jemaat, beberapa Jemaat bersekutu dalam satu Resort, seluruh Jemaat bersekutu dalam GKPS (Pasal 10-12)

3) Bani mungkahni, dob marpussa periode ni Pengurus Resort, boi do ipilih use. Tapi ipudi ni ari, ai ma mamungkah tahun 2000, sibar 2 periode do hansa boi bani jabatan na dos. Anggo domma 2 periode, lang boi pilihon be.