Saturday, July 21, 2007

MAR-KURIA (13)

Parhorja

Panohuon, ipanayatkon dayok

Sanggah mamungkahkon Kuria (GKPS) Bandung ma homa ijia hupungkahkon horja panohuon hu pagori ni Kuria. Panohuon in ma deba horja pangidangion (pelayanan) ni Parhorja Kuria. Pdt. AHP Girsang ondi ma na ringgas mambaen panohuon, manrohi rumah ni pagori. Gabe usihan ma ai hu bennami Parhorja

Bani sada panorang, tarojur ma uhurnami (ahu pakon Inang-i-rumahku) manohu pagori na marianan i komplek ni tentara i Jl Gatot Subroto, humpit suah ni Kota Bandung. Ai pagori ni tentara do sidea. Lang hudingat be aha morga ni bapa sonai age inang na tinohunami on. Na hudingat, itohu hanami sidea halani sihol ni uhurnami mambotoh sonaha do kabar ni sidea. Somalni gati do roh marminggu, hape panorang parpudi on hundokah ma lang mulgap.

Marlereng do hanami manrohi rumah ni sidea on. Ijia lape piga angkot. Bahatan do halak marbeca ijia anggo lang dong motorni (mobil) . Anggo marbeca hanami, sobali ongkos na maningon dong, laho mulak pe holi haru ma marbeca, ai manangkog do dalan. Ai ma ase marlerang hanami. Ai anggo marlereng, lang pala loja dompak suah. Mulakni pe boi mardalan anggo parah ma manangkog.

Sonin das hanami i rumah ni sitohuonnami on, malas tumang ma uhur ni Inang na nirohannami on manjalo parrohnami. Bapa tudu do lang i rumah halani sanggah horinni gakni martugas.

“Halani na so marminggu ai ma gakni hanami, tene, ase roh nasiam,” nini Inang nirohannami on tawa.

“Lang halani ai. Na marsihol-sihol do. Ase nabotoh atap na horas-horas do nasiam, ai tarhundokah ma hita lang pajumpah,” ningku ma mambalosi.

Dob iarahkon hanami hundul hu rumah, ididah hanami na mesek tumang do uhurni manjalo parrohnami on. Hudingat, rattip ma hanami marbuali, hansi pe lang sai hudingat be aha na ibualhonnami ia. Na hudingat tangkas, lang ilopas hanami mulak anggo lang palobei mangan. Hasomalan i huta ni halak Simalungun do ibahen manjalo parrohnami on. Ai ma ase dong do gulei dayok attup ni indahannami on. Lang ibotoh hanami sonaha pardong ni gulei dayok on. Tapi, hira na ipanayatkon dayok do parrohnami on, songon na somal i huta ni halak Simalungun.

Sanggah mamuhun mulak ma hanami, ipagolomkon Inang nirohannami on pe homa duit bani Inang-i-rumahku, nini ase dong mamboli siluahnami bani dakdanak i rumah.

Borat tumang do namin uhurnami manjalo duit napinagolomkon ni on. Tapi halani huidah tongon do halani banggal ni uhur ni do bani parrohnami on, huundukkon ma bani Inang-i-rumah ase ijalo banggal ni uhur ni on.

Sanggah laho mulak hanami, lang sai iahaphon hanami be loja ni na mandalani dalan na manangkog marayak rumahnami dohorhon Simpang Dago-Siliwangi, angkap malas ni uhurnami mangidah na malas tumang do hape uhur ni pagori ni Kuria anggo itohu Parhorja.

Hunjin ma homa dapot uhurhu, panohuon ma hape deba horja pangidangion na iarapkon pagori hun bani Parhorja ni Kuria. Marhitei panohuon do napataridahkon tongon ma sisada parsaoran do Kuria in, parsaoran na mapansing nidokan. Si sada parsaoran marhitei parmingguan (marhasadaon i lobei ni Naibata, marhasadaon mamuji Naibata marhitei doding, marhasadaon marhitei na riap mansopothon dousa, riap manaksihon hata haporsayaon, marhasadaon manjalo Hata ni Naibata marhitei Epistel pakon Ambilan). Sonai homa age marhitei partonggoan marrumah-rumah pe, hataridahan ni hasadaon do deba ai, lang pitah na manjalo Hata ni Naibata hansa partonggoan in.

Panohuan pe, ai ma marhitei na marsitandangan pakon pagori sonai samah Parhorja, boi do homa ibahen mangagouhon bagei parjungilan sonai age partinggilan na hotop mangambati hasadaon ni Kuria si sada parsaoran nidokan.

Sonai ma ijia santorap i Kuria pamungkah i Bandung. Tarbogei ahu ma dong sahap-sahap na mangkatahon na laho lang gan roh sahalak Sintuanami hu Horja Banggal Na Pansing na laho sipamasaon ni Kuria. Gan halani dong na hait pangahapni halani sahap ni Porhanger. Halani ahu do Porhanger, gan halani ahu ma mambahen na laho sundat on ia roh mar-Horja Banggal Na Pansing.

Hudingati do namin, tapi lalab do lang dapot ahu aha na hubahen atap na huluarhon na mambahen borit uhurni bakku. Tapi halani domma dong sahap-sahap sonai, huriahkon ma bani Inang-i-rumah ase martandang hanami hu rumah ni Sintua on paima masa Horja Banggal Na Pansing na dob iranggihon on.

Bani na sadari, saud ma roh hanami tapang martandang hu rumah ni Sintua on. Sonin hanami das, mintor ididah hanami ma. sonin ma molos ni uhurni manjalo parrohnami on. Mintor iarahkon do hu rumah. Janah rattip do parbulannami. Domma huranggihon hinan i bagas uhurhu, lang anjai sungkunonku aha do na mambahen dong borit ni uhurni hu bakku. Legan ma anggo ia na tarsingat. Domma hupasirsir uhurhu ase marsuhutan ahu gendo marpanganju ia pori dong lepakhu.

Dob dokah hanami na marbuali on, deba ma ai martaringat pasal parngitni na mangaldung gambiri ahu hun huta Sinundol, dohorhon Bahpasunsang - ai par Bahpasunsang do Sintuanami on – lalab do otik pe lang tarsingat ia na dong borit ni uhurni hu bakku. Janah huinteihon ma, pori dong hinan pe borit ni uhurni hu bakku, domma sabou ai marhitei parrohnami on. Halani ai, managam laho mulak ma hanami, ai laho golap ni ari ma.

“Ia, lang sonai da,” nini Sintua on ma bennami. “Lang bulih nasiam mulak hun rumahta on anggo lang palobei mangan. Domma mardahan Inangnami. Palobei mangan do ase mulak nasiam.”

Saud do palobei rap mangan hanami ase boi mulak. Sanggah na manlangkahkon na mulak on ma hanami, nini Sintua on ma paingkathon hanami:”Horja Banggal Na Pansing hape hita minggu na roh on, tene.”

“Ai ma da,” ningku marbalos, irik hununut manlangkah laho mulak.

“Roh pe hanami. Sai daoh ma abat-abat,” nini.

Bani minggu ni in, roh do tongon sidea tapang mandihuti Horja Banggal Na Pansing. Malas uhur, marhitei na marsitandangan boi do hape sabou pori na dong hinan pe borit ni uhur.

Dob pindah hanami hu Medan (1972), pajumpah do use ahu pakon Sintuanami on. Ai ma sanggah Porhanger ia i Kuria (GKPS) Padang Bulan. Tawa bei do hanami na pajumpah on. Na dingat ma ge sonaha hanami mamungkahkon dong Kuria (GKPS) i Bandung.

Tarsingat pasal horja panohuon in, bahat podah na ibere hu bani Parhorja sanggah Sermon ni Parhorja barang sanggah kursus-kursus na iadonghon Kuria hu bani Parhorja. Age bani bagei buku sibasaon ni Parhorja pe bahat do podah pasal horja panohuon. Marhitei Sinode Bolon ni GKPS pe ongga do iondolhon hinaporlu ni panohuon in. Pala do ionjapkon ase ganup Parhorja dong bei juma tangananni marmahani piga-piga pagori ni Kuria, janah siranggihon ni Kuria ma ai bani Rencana Kerja (Tahunan) ni Kuria.

Dihut do ipodahkon ase sanggah panohuon in bahatan ipakei Parhorja pinggolni manangihon holsoh ni Pagori. Janah nihurhu pasal in ma na hotop lolei Parhorja. Ai otikan do use panorang ipakei Parhorja mambogei holsoh ni Pagori marimbang panorang na ipakei Parhorja padashon sahapni – dihut ma ijai padashon Hata ni Naibata – gariada hotop lang tarhorom Parhorja papuaskon dirini sandiri marhitei mansahapkon pasal dirini sandiri. Ai ma ase ra do otik pe lang dapot Parhorja na manohu on sonaha do barita ni natinohu ni on.

Pasal na marbanggal ni uhur Pagori hu bani Parhorja na manohu, ai ma na ipagolomkon pagori na tinohu duit hu bani Parhorja na roh manohusi, songon na dob huturi-turihon nongkan na ongga hujalohon ijia sanggah na manohu Pagori hanami i Bandung, dong dua pangkorhonni bani hadirionku. Hujalohon ai ijia halani tangkas huidah angkap banggal ni uhurni do manjalo parrohnami on. Nini namatua i Simalungun, boritan do gan mulak mambere ase mulak mangindo. Ai ma ase hujalo do. Tapi balik ni ai ma homa, lambin manat ma ahu padalanhon horja panohuon. Ulang ma namin sompat huparsidalian horja panohuon in hape na huparleilei ase dapotan banggal ni uhur do, atap hinaotikni ase ‘sipujion’. Pangkei ma mangagak ahu ibagas uhurhu sonaha ase ulang mangkarui barang mamborati sitohuon on use horja panohuonhin.

Dob pindah hanami hu Kuria (GKPS) Jl Sudirman Pematang Siantar, sonai age dob pindah use hu Medan, hira lang be huahapkon nolihku horja panohuon in. Ai buei do hanami Parhorja. Domma dong bei nolih ni Parhorja i tiap Sektor ni Kuria. In homa, huidah ra ma bahatan Pagori in na mangahapkon mamboratisi pori roh ahu manohusi. Ai ijia, lang ope piga na Sarjana Hukum songon ahu. Beteng tumang ma ididah sidea anggo domma Sarjana Hukum. Borat ma uhurni anggo maningon Sarjana Hukum mambahen panohuon hu bani. Sonai do age dob i Medan hanami. Na beteng ma nini uhur ni simbuei anggo domma Anggota DPRD. Halani ai huhorom ma diringku mangkorjahon panohuon.

Tapi, sibar na tarbahen ahu, hupala-palai do roh anggo dong horja-horja ni Pagori, horja malas ni uhur age horja na mardomu hu bani pusok ni uhur. Ai hira panohuon do homa ai. Diatei ma homa, sai marharinggason do Inang-i-rumahnami manrohi horja-horja in pori pe lang tarbahen ahu rap roh pakonsi. Ai domma lambin roh bueini horjaku dob na Anggota DPRD, tambah ope halani dihut do homa ahu Pengurus ni GOLKAR pakon piga-piga organisasi na legannari i tingkat Provinsi Sumatera Utara.

Hotop do songon na marhutuk Inang-i-rumahnami halani na hotop ai ma lang tapang hanami manrohi horja-horja ni Pagori. Ningku ma mangalumi uhurni:”Mangihutkon adat ni Simalungun da, anggo domma roh ijin inang, na dob gok ma parroh ai hansi pe lang tapang pakon bapa. Ai ma ase bani adat Simalungun, tunggungan do inang ase bapa. Pori pe lang ijin bapa, boi do ipadalan inang horja paradaton. Ai inang do manurduk demban age manurduk sipanganon. Inang do homa padalanhon hiou pori na manghioui ondi. Tapi pori bapa hansa roh, lang dihut inang, haru ma, ai lang boi bapa manlahoi ai ganup. Maningon inang do.”

Nini Inang-i-rumahnami ma marbalos:”Domma hubotoh na laho sonai do balosmu.” Dob ai nini ma use mungut:”Ben lang ham do, lalab mambalosi sungkun-sungkun ni halak hansa diri. Ai sai buei na manungkun ‘ija bapa?’, ‘huja bapa?’.”

Ningku ma use nanget, janah sengeh:”Sidalian ni halak do ai laho manisei ham. Malas ni uhur do ai anggo sisei pe halak bendiri.”

Tapi ibagas uhurhu, huparhatongon do na lambin roh lansei ahu mandalanhon horja panohuon in. Hape Porhorja ni Kuria do ahu. Gabe dihut ma ai deba paruntulon ni Parhorja ni Kuria anggo lambin roh bahat ni ma horja ijamah i loulouan ni maujana (masyarakat). Sobali na roh hurangni panorangni dompak horja i Kuria, roh hurangni ma homa idalankon horja parmahanion dompak pagori ni Kuria. Gariada, dihut ma homa use ia siparmahanon ni Kuria.

Sonai ma santorap, sanggah hahontusanni horjaku i maujana tingkat Sumatera Utara (pakon tingkat nasional tene) tarlobih marayak Pemilu, roh ma telepon ni Ephorus Pdt. A. Munthe hu bakku. “Ija do parmanganan na sodap i Medan on, Sintuanami. Bobai ham lobei ahu, sihol rap mangan ahu pakon ham,” nini sompong. Sompong do ai huahapkon, halani ai pe ongga iarahkon au mangan i restoran. Mintor podas do dapot uhurhu, na dong do na sihol sahaphononni hu bakku, ipardua-duahon.

Dob hupatugah ianan parmanganan na dearhonsi (bani Ephorus), ai ma i rumah makan ‘Jenar’ i Jl Gatot Subroto, restoran ni hasomanku Anggota DPRD, marpadan ma hanami ase pajumpah ijai hanami.

Lang piga dokah dob das ahu i restoran on, huidah ma ia roh. Ijabat tangani ma ahu, irik sirom tong bohini. Hubobai ma ia hu Lantai-II ni restoran on, ai ijai lang pala bahat jolma. Sanggah mangan hanami, marhujai hujon do na ibualhon hanami. Lape dapot ahu aha na sihol pardua-duahononni on hu bakku. Sonin salosei hanami na mangan on, mintor idilo ma Pelayan ase roh mamboan bon ni napinangannami on. Irik ihatahon ma hu bakku:”Santorap on ahu do manggalar, halani ahu do mangarahkon ham mangan.” Ipoluk ma hunsangni mambuat duit ase dong bereonkonni bani Pelayan nongkan. “Iagan ham do gakni na lang dong duit ni Ephorus,” nini marhuria hu bakku. “Dong do. Tapi ra bahatan do duitmu,” nini, itawahon. Mago-mago sip mando ahu, halani tarpaima-ima do ahu, songon na ngolngolan paimahon aha do na laho pardua-duahononni hu bakku, hape songon na manrantam laho mulak ma ia.

Sanggah jolom ia tasni manrantam laho mulak, nini ma hu bakku:”Dob das holi ham i rumah, basa ham ma holi Hata ni Naibata na tarsurat bani ayat na husurathon on,” nini, irik manuratkon ayat nidokan ni on, iondoshon bakku. Sanggah marjabat tangan hanami halani laho misir ma ia, nini ma use:”Das do bani pinggolhu bagei ni sahap ni jolma na so patut tangaronkon pasal ham. Halani ai, basa ham ham holi Hata ni Naibata bani ayat na husuratkon in,” nini, irik ilangkahkon langkahni laho mulak.

Soppat do lobei jonong ahu paingkathonsi manadingkon restoran on, jolom bani hortas panuratanni nongkan. Dob daoh ia, tarjolma ma use ahu. Mangapian ma ahu bani pandalankonni bani horja panohuon ni in, atap pe horja parmahanion ni in. Lang pala dong podahni, lang isompatkon mangambilani ahu. Lang homa pala ipatangkas atap na sonaha ma tongon baloshu pasal sahap-sahap ni halak nidokan. Pitah iparjumpahkon do hansa ahu, dob ai ibere Hata ni Naibata sibasaonku holi i rumah.

Mintor huarusi ma na pahotkon uhurhu do parrohni on. Dobdob do gakni ipasirsir dirini laho mangapiti ahu, sedo laho ‘mamareksa’ atap sibar ja do tongonni sahap-sahap ni halak na binogeini na pahirihon ahu. Pangapiti do horjani, sedo songon na laho maminsang. Pori pe dong do tongonni sahap-sahap na binogeini on, pori do da, pangapiti do parrohni.

In ma na pamalas uhurhu. Ai das do homa hu bani pinggolhu na dong sahap-sahap ni halak pasamborhon goranhu i loulouan maujana. Dong ma ai sahap na mangkatahon domma gan dong ‘simpanan’-hu, mardua-parsonduk nidokan.

Halani marmusim do parmulgap ni sahap-sahap in, ai ma musim laho Pemilu honsi, ai ma dob tarbotoh na laho calonhonon pe use ahu, calon Anggota DPRD SU. Halani ai, girah do dapot uhurhu na biak ni ‘politik’ do in. Sonin jumpah panorangni marayak Pemilu, marlumba ma halak ase dihut calon. Ia lang tarbahensi patuduhkon halobihanni, ipindahi ma dalan pasambor-samborhon bakal calon na dob dong, ai nihurhu na laho roh lumbangni ma dalan bani pori boi madabuh bakal calon na dob dong nongkan.

Ai ma ase hupasip do hansa pori pe domma dong hubogei sahap sahap na pasambor-samborhon in. Ai girah do homa hubotoh kiat ni mandompakkon ‘gossip’. Ai ma ipasip. Lang pala nalojai diri-diri marhitei na mambere hatorangan ‘membela diri’, ai lambin gara do gossip in. Tapi anggo napasip, lambin sip do, lambin minop, magou-magou sonin.

Ai ma ase dob na ipardua-duahon Ephorus on ahu, hubotoh ma pasal gossip in do parrohni in, hupalambas ma diriku mangulaki horjaku i kantor DPRD. Malebodni pe dob mulak ahu hu rumah ase hubasa Hata ni Naibata nabinere ni Ephorus nongkan. Tongon ma, Hata na pahotkon uhur do manlawan sahap-sahap ni halak na pahirihon diri, hansi pe lang be hudingat bani buku/ayat na ija tarsurat Hata ni Naibata in.

Humbani panohuon atap parmahanion ni Ephorus in ma homa gabe dapot uhurhu, na porlu do hape marbohal pangapition Parhorja mandalankon horja panohuon roh hu bani Pagori ni Kuria.

1 Comments:

Blogger sarmedipurba.blogspot.com said...

Dalam tulisan ini dapat kita nikmati cerita dalam bahasa Simalungun kontemporer yang masih asli. Asli bukan berarti baheulak, tetapi asli maksudnya tidak mencampuradukan kata-kata Indonesia kedalam kalimat Simalungun seperti sering kita lihat pada tulisan berbahasa atau khotbah bahasa Simalungun. Mengatur bahasa dalam kata-kata asli Simalungun membutuhkan pendalaman dan pengalaman bagaimana satu pikiran dirumuskan dalam bahasa Simalungun. Inilah yang saya kira unik pada tulisan ini.

6:57 AM  

Post a Comment

<< Home