MAR-KURIA (12)

Parhorja ni Kuria

Palobei manapu ianan parmingguan

Diatei do i Kuria GKPS Bandung ijia hupungkahkon gabe Pahorja ni Kuria, ai hira Kuria na baru itombei pe ijia Kuria Bandung. Gabe boi ahu mangkorjahon ganup na patut horjaonkon ni Pelayan (=Parhoja) ni Kuia.

Ongga do maningon manggirahi hanami borhat hun rumah laho hu parmingguan. Natopong ma lobei baju banggal (pakon dasi) hu bagas tas. Ai anggo marbaju banggal dobdob diri hun rumah, hurang suman do holi parhundul i opelet (angkot) . Somalni, anggo sogod diri mar-opelet hun Dago dompak suah, bahatan partiga-tiga sayur do hasoman sa-opelet.

Das i parmingguan, ai ma sada humbani ruang kelas ni parsikolahan na i suah ni Lapangan Merdeka, berag pe bangku ni ruang kelas in jumpah. Dasor ni pe lape isapu. Laho patorsahon in ma ase manggirahi hanami roh. Ibuat Inangnami ma sapu. Isapu ma lobei ruang kelas in. Meja pakon bangku ipaborsih, dob ai dihut ma ahu mangatur gendo suman ianan parmingguan.

Dob salosei horja na manapu pakon na mangatur ianan parminguan on, naugei ma tas ianan ni baju banggal nongkan. Na pakei ma baju banggal in. Dob sonai sirsir ma hanami mangalo-alo parroh ni Parhorja irik manginteihon atap roh do ganup parhorin bani minggu sadari ni in. Anggo dong parhorin na lang roh, naaturon ma ise humbani Parhorja na roh laho manjampung horja ni na lang roh in. Ra do homa roh do namin Parhorja na lang siparhorin. Tapi, ra do homa bagei ibahen sidalian ase ulang ia manjampung. Ai ma ase ra do, ahu ma saudni panjampung. Halani ahu do Porhanger.

Halani hanami do parlobei das i parmingguan, hira hanami ma homa mangalo-alo pagori na roh marminggu. Manisei ronsi mambobahon janah mangaturhon ase marsibuat hundulanni.

Ai ma homa untung ni na dob hulahoi horja manapu inanan parmingguan in, pakon horja na mangalo-alo parroh ni pagori na roh marminggu. Hunjia nari, hira lang ongga be etek uhurhu mangidah Parhorja na mambuat nolih patorsa-torsahon ianan parmingguan, sonai age nolih mangalo-alo parroh ni parminggu. Ai hira dos do banggal pakon tunggung ni horja pangidangion in pakon horja na patumpu galangan, horja ‘sibasa doding’, horja ni si paragenda, ronsi horja na padashon ambilan. Riap mardomu marsidungdungan do ganup horja pangidangion in ase torsa parmingguonkon.

Dob pindah hanami hu – janah Sintua homa – Kuria (GKPS) Jl. Sudirman, Pematang Siantar, tongon lang be ongga ionjapkon ahu pasirsirhon ianan parmingguan sonai age mangalo-alo na roh marminggu. Domma dong isaraya ijia mangkorjahon horja pasirsirhon ianan i gareja. Domma homa dong na mambuat nolih mangalo-alo parminggu, tarlobih parminggu na tarlambat roh.

Sanggah na i Kuria Jl Sudirman in ma ijia, mangapian tumang do ahu bani hinapongkut ni St. Ragu ondi manlahoi nolih na pinilih ni sandiri, ai ma mangalo-alo parminggu na tarlambat roh. Ibuat do hundulanni i lambung labah ni gareja. Ia dong parminggu na roh, jongjong do ia laho patuduhkon bangku na lape ihunduli halak, ase hujai parminggu on hundul. Anggo tudu ma sanggah martonggo barang sanggah mambasa Hata ni Naibata si paragenda, iarbonghon ma tanganni, ase soh lobei paimahon parminggu na tarlambat roh in. Sanggah mandoding pe Kuria ase ibere janah ipatuduh dalan hu bani siparminggu na tarlambat in.

I gareja Pematang Raya pe sapari, soppat pe hudingat ai, hira horja sonin do nolih ni St. Ragu in. Irik ma homa manjaga baliang ase ulang masuk hu gareja. Ai ma ase dong do ijia na marhuria-huria, tapi lang na mangengen-engen, manggoranasi ‘Sintua panjaga baliang‘.

Bagei do horja mangidangi i Kuria. Marsibuat nolih ni bei ma namin hombar hu bani habotohon sibere-bere ni Naibata hu bani Parhorja in marsada-sada. Ia tudu dong nolih na lang dong Parhorja na mambahen ai nolihni, namin dong ma Parhoja na legannari mambuat nolih in. Age pe habotohon marambilan do namin sibere-bere bani, maningon ra do ia manjampung horja na legannari ai pori lang dong Parhorja na ra mambahen ai nolihni.

Tarsonai ma ijia age Lawei St. Horti Purba ondi i Kuria (GKPS) Hang Tuah, Medan. Hira lang ongga ihorjahon nolih na legan sobali Bendahara Kuria. Gakni ibotoh do horja pangidangion sisonin do sibere-bere ni Naibata bani. Ai ma ase jimot janah ipongkuthon do mangkorjahon nolih ni in sadokah itodoh Kuria pe ia jadi Bendahara Kuria. Ongga do gan dong na mangindohon ase ongga ia marambilan, halani Sintua do ia. Tapi nini ma gan mambalosi: Dong bei do sibere-bere ni Naibata; ia ibere Naibata habotohon marambilan, marambilan ma ia; bahat ope horja na legannari sihorjaonkon ni Parhorja ni Kuria sobali marambilan.

Pasal horja na pasirsirhon ianan parmingguan, dob i Kuria (GKPS) Sambu Baru, Medan, hanami, ongga do ibuat Wanita GKPS nolih pasirsirhon bunga (ai ma bunga hidup nidokan) tiap minggu, ipindohon sidea hu bani Majelis Jemaat. Saud do mardalan sonai marpiga-piga dokah. Marhorin ma sidea samah parinangon i Kuria in pasirsirhon bunga. Ai ma ase lang dos bunga tiap minggu, halani pagassih do na pasirsirhon.

Halani ongga ma sonai, sonari on hiranan ma use diri ase sonai namin use. Ase ulang lalab bunga hortas atap bunga plastik na dos lang marnamelus paidah-idahon humbani minggu na sada hu minggu na sada nari.