MAR-KURIA (16)

Parhorja

Majelis Jemaat

Domma ihasomalhon Kuria-Kuria i Simalungun humbani nahinan, dong do hasadaon ni Parhorja ni Kuria, ai ma na igoran Kerkerat (Kerkeraad). Pangarusion pasal Kerkerat in boi do ‘rapot ni Parhorja, harungguan ni Gamot ni Kuria’, boi do homa goran hasadaon ni Parhorja na manatang ganup horja ni Kuria, atap na somal igoran badan kepengurusan ni Kuria. Marrapot ma Kerkerat manriahkon sihorjahonon mangidangi Kuria, sonai ronsi panghorjahononni. Porhanger do mambobahon rapot. Lanjar Porhanger do homa holi manguluhon sanggah panghorjahonon.

Gakni halani hurang ni pangarusion pasal aha do Kerkerat, bahat do Parhorja na lang pala tangkas mangahapkon na sisada horja do Kerkerat. Halani ai ma ase nihurni deba Parhorja, marrapot Kerkerat ai ma tang horja ni Parhorja, manriahkon aha sihorjaonkon anjaha manimbang partorsa ni panghorjahonon. Anggo dong na hurang torsa bani panghorjahonon, lalab ma ihatai, hira na lang dihut ia sihataon pasal na hurang torsa in.

Sanggah Porhanger ahu i GKPS Bandung (1964-1966), lang piga namin hanami Parhorja na mangahapkon pitah marrapot pakon manimbang partorsa ni panghorjahonon hansa horjani. Gakni ma ai halani na dadap-dadap bei pe hanami Parhorja, lape sai iarusi na mar-Kerkerat.

Tapi dob pindah hanami janah jadi Parhorja (Sintua) ahu i GKPS Jl Sudirman, Pematang Siantar (1967-1971), sonai dob pindah use hu Medan (GKPS Sambu Baru, Resort Polonia lobei, dob ai gabe pamatang ni Resort Medan Barat), hupaidah-idah ma na lang piga Parhorja na mangahapkon sisada horja do na mar-Kerkerat in, bahatan do na mangahapkon janah mamparlahouhon pagori ni Kerkerat do hansa ia. Pori na marhutuk ondi ia bani rapot Kerkerat, lang iahapkon na dihut do ia sihutukon.

Ipudi ni ari, bani Tata Gereja pakon Peraturan Rumah Tangga GKPS (tahun 1974) isuratkon ma tulimat ia kepengurusan ni Kuria ai ma Majelis Jemaat. Jadi, Majelis Jemaat sedo goran ni rapot, tapi goran ni kepengurusan do, hariapan ni Parhorja na manjolom ronsi na martanggungjawab bani horja pangidangion i Kuria.

Ganup Parhorja na dong i Kuria in do pagori ni Majelis Jemaat. Ai ma Sintua pakon Syamas napinabangkit ni Kuria pakon Pandita ampa Penginjil na pinabangkit ni kepengurusan sa GKPS (na marianan janah pagori ni Kuria in).

Rapot ni Majelis Jemaat in ma memilih ise Ketua pakon Wakil Ketuani, ise Sekretarisni pakon Bendaharani. Lanjar Ketua / Wakil Ketua na tarpilih in ma homa na igoran Pengantar Jemaat / Wakil Pengantar Jemaat, ai ma na manguluhon panghorjahonon.
Hansi pe domma hira jojor isuratkon aturan pasal Majelis Jemaat in, tapi anggo bani pandalanhonon, hira dos do songon hasomalan sanggah paima dong Peraturan in. Goran Porhanger pe lalab do ipakei. Nihurni na deba, hira na dos do hansa Porhanger pakon Pengantar Jemaat. Goran do hansa na mubah. Gariada, age bani panorang marrapot (Rapot ni Majelis Jemaat), hira goran ‘Pengantar Jemaat’ (atap sipata goran ‘Porhager’) do igorankon hu bani na manguluhon rapot, lang ongga igorankon ‘Ketua’.

Gakni halani na sonai ai ma panggoranonkon, gabe sonai ma homa pangabakkonon. Nihurhi parrapot, Porhanger sapari ondi do na manguluhon rapot. Romban hujai ma homa pangabakkon ni na manguluhon rapot, hira Porhanger sapariondi do ia manguluhon rapot, sedo Ketua. Ai ma ase hotop do songon ‘Kepala’ (Kantor) ia mambobahon rapot, manggorei aha sihorjaonkon ni Parhorja na marrapot, sedo mambobahon rapot manriahkon aha sihorjahonon pakon sonaha panghorjahonon.

Halani sonai do pangabakkonon ni na manguluhon rapot, hira Porhanger sapariondi, lang Ketua, tarihut-ihut ma homa pagori ni rapot marpangabak songon pagori ni Kerkerat sapariondi. Gariada nihurni na songon perwakilan ni Pagori ni Kuria do ia manimbangi partorsa ni panghorjahonon ni kepengurusan ni Majelis Jemaat, lupa ia na pagori ni kepengurusan ni Majelis Jemaat in do ia, na dihut do ia martanggungjawab hu bani Rapot ni Pagori ni Kuria (Sidang Jemaat).

Paidah-idah parmahol ni horja paubahkon pangabakhonon ni Parhorja ase ulang be songon hasomalan sanggah Porhanger ampa Kerkerat sapariondi, sompat do lobei songon na jut uhurhu, lalab marmase-mase ibagas uhurhu. Deba ma gakni ai halani na dihut ai ahu bani Panitia na mambahen konsep ni Tata Gereja in paima iboan hu Synode Bolon. Ninuhurhu, anggo domma iputushon Synode Bolon, mintor boi ma mardalan i Kuria-Kuria.

Dobni, dob ngolngolan lobih 20 tahun, lambin huarusi ma porlu do hape marhasabaron. Ai porini pe nanget parmubahni, tapi lambin mubah do. Anggo bani mungkahni ondi bahat do pagori ni Majelis Jemaat na dihut manimbangi laporan ni Majelis Jemaat sanggah ipadas hu Rapot Kuria (Sidang Jemaat), dobni lambin lang be dong. Ai ibotoh ma na dihut do hape ia mambahen ronsi padashon laporan Majelis Jemaat ai, ai pagori ni Majelis Jemaat do ia. Lambin roh bueini ma homa Majelis Jemaat na mambaen Laporanni hu Sidang Jemaat hira Laporan Pertanggungjawaban pandalanhonon bani ranggian na itotapkon sanggah bona ni tahun. Lang be pitah barita na masa hansa, tapi dihut ma patugahkon sonaha hinan iranggihon, sonaha dobni bani pandalanhonon, aha ma deba mambahen na saud barang na lang saud tardalanhon na niranggihon in hinan.

Lambin buei ma homa Majelis Jemaat na mangaturhon parbagi ni horja ni pagori ni Majelis Jemaat. Sobali na mangidangi i parmingguan atap partonggoan (sibasa doding, diparagenda, siparambilan), dong ma na ibaen gabe Pembimbing ni Seksi, dong na ibaen gabe Ketua ni Sektor, dong homa bagi ni horja parmahanion marhitei na manontuhon ise-ise Pagori ni Kuria na gabe “juma tanganan” ni tiap Parhorja. Lambin taridah ma na badan kepengurusan do Majelis Jemaat, sedo harungguan (rapot) tumang.
Sanggah i GKPS Jl Sudirman Pematang Siantar, sonai age sanggah i GKPS Sambu Baru Medan, ongga do ahu ibaen gabe Pembimbing ni Seksi Pemuda marpiga-piga dokah. (Dong surungni na gabe Pembimbing Pemuda. Ai dob matua diri, humbuei do pagori ni Pemuda in hinan na manisei diri, halani sai idingat do Pembimbingni sanggah Pemuda GKPS ia. Dong ma in deba na jadi Sintua, jadi Pengantar Jemaat).