MAR-KURIA (10)

Parhorja ni Kuria

Sanggah dakdanak ahu, domma hubotoh Sintua do Bapanami. I Kuria Pamatang Raya do lobei, dob ai i Kuria Sondiraya, dob manjae Kuria Sondiraya hun Kuria Pamatang Raya. Sadokah ahu mardingat, goran ‘Sintua’ ai do gatinan ipakei halak manggoransi. Dong manggoransi Sintua Sigumonrong. Deba manggoransi Sintua par-Toko Obat Sigumonrong, atap Sintua Parjual Tambar. Hasomanni satorbang manggoransi Sintua Tarianus. Ai Tarianus do goran ni Bapanami in, Purba Sigumonrong morgani.

Ai ma ase girah do dapot uhurhu gambaran ni ‘Sintua’. Parhorja ni Kuria do Sintua, rap pakon Parhorja ni Kuria na legannari ai. Ijia, na ginoran Parhorja ni Kuria ai ma Guru, Sintua, Kasbestur. Dihut do homa Pandita igoran Parhorja ni Kuria. Tapi halani sada do Pandita mangidangi piga-piga Kuria, martorap do hansa roh Pandita hu Kuria. (Dob manjae Kuria-Kuria ni halak Simalungun hun HKBP, ai ma na gabe HKBPS (1952), dob ai use margoran GKPS (1963), goranan ni Parhorja ni Kuria ai ma Pandita, Penginjil, Sintua pakon Syamas. Na margoran ‘Guru’ lang be ipakei, halani lang dong be Sikolah Guru Sending, harohan ni ‘Guru’. Ganup Guru-Guru na dong ope, igoran ma Sintua use).

Ijia, gambaran na dapot uhurhu pasal Parhorja ni Kuria, ai ma na basar halakni, lang urah manggila, lang pardomdom, ringgas bastu padameihon anggo dong na martinggili, ringgas manrohi horja-horja anggo dong na mangabeihon, ringgas marminggu, ringgas mandalankon horinni mangidangi parmingguan sonai age partonggoan pakon tumpuan-tumpuan nanidongkon ni Kuria, sitiruon bani hinadear ni parlahou, ronsi ganup na dear na legannari ai. Hinaotikni, ai ma gambaran na dapot uhurhu mangidah hasintuaon ni Bapanami in. Ijia pe, domma dapot uhurhu homa, lang namin ganup Sintua songon gambaran ni ginoranan in. Ai pe sipujion ma homa, ai ra gabe Parhorja, ra ia mansurahon ase hajolmaonni romban hu bani naniarapkon humbani Parhorja ni Kuria.

Lobih ni ai ope gambaran na dapot uhurhu pasal Pandita. Ai hira ganup goluhni do ibere Pandita bani Kuria. Sobali sitiruon bani parlahou pakon pangidangion, Pandita do homa pamodahi ni ganup Parhorja ni Kuria. In homa, na girah hinan do isurahon ase saud jadi Pandita. Ai palobei dalananni do Sikolah Pandita marpiga-piga tahun. Sadokah na Sikolah Pandita ai ia, domma lambin tardoudou uhurni na haho jadi Pandita do ia. Halani ai ma ase na dapot uhurhu, tunggung tumang janah susi do ‘jabatan’ Pandita i Kuria.

Ijia, mangihutkon pardingatku, hira lang piga na ra gabe Parhorja ni Kuria. Hira na ielek-elek do ase ra jadi Parhorja. Ai iahapkon, lape boi berehononni pargoluhon naniarapkon jumpah humbani Parhorja ni Kuria.

Ahu pe, hubotoh do diringku. Lang ongga, atap hatahonon ma tene lang pag ahu, mansurahon gabe Parhorja ni Kuria. Age pe Sintua Bapanami, lang ongga husurahon ase gabe Sintua ahu i pudian ni ari songon Bapanami in. Gariada hupadaoh do sura-sura sisonin humbagas uhurhu.

Pasal in, ongga do martaringat Inangnami pasal parbualanni pakon ahu sanggah poso tumang ope ahu (sanggah SMP ma gakni ai, ai ahu pe lang be tangkas hudingat na dong parbualannami on). Nini Inang martaringat: Sapari, ongga do husurahon ase jadi Pandita ma namin si Mansen on. Jadi, santorap hupadas ma na ibagas uhurhon, ningku ma hu bani:’Hu Sikolah Pandita ma namin ho, ase dong sada hanima na jadi Pandita’. Roh balos ni Mansen on ijia, ‘Lang maningon jadi Pandita ase boi mangidangi i Kuria’. Ipandapoti do tongon hatani ai, ai age pe lang Pandita ia, ra do ia ipakei Naibata gabe Parhorja ni Kuria.

Sanggah i Siantar ma hanami marianan na martaringat on ia, dob mulak hun Bandung. Ibotoh do, domma Sintua ahu sanggah i Bandung hanami marianan, janah Porhanger (Pengantar Jemaat) homa. Pindah hanami hu Siantar, gabe Sintua ma homa i Kuria (GKPS) Jl. Sudirman.

Songon na dob husobut nongkan, lang sai hudingat be na ongga sonai ningku ijia dompak Inangnami in. Tapi pori tongon pe ongga huhatahon ‘lang maningon jadi Pandita ase boi mangidangi i Kuria’, hira balos sonin-sonin tumang do hansa ai, gendo ulang balos na sugad, na boi paroh rimas ni uhur. Jadi sedo balos na mansurahon ase Parhorja ni Kuria ahu magira.

Hape, na so niagak ni uhur, na so ongga naparnipihon, lape gok umurhu 27 tahun, domma tardilo ahu gabe Sintua, sanggah i Bandung hanami marianan, sanggah marhorja sambil marsikolah ope ahu i Universitas Padjadjaran

Hunjianari ma ahu gabe Parhorja ni Kuria i GKPS. Dob gok umurhu 65 tahun (ai ma sanggah mar-Kuria i Kuria Jl. Sudirman), mangihutkon aturanni, iparontihon ma namin ahu humbani Parhorja ni Kuria (ai ma naginoran ‘bebas tugas’ nidokan). Tapi halani hinalolei ma gakni ai, dob mar-Kuria i Kuria Sambu Baru pe use ase dapot ahu ‘Sinata’ ‘bebas tugas’ nidokan humbani Sintua, hape madohor 70 tahun ma umurhu.