MAR-KURIA (11)

Parhorja ni Kuria

Ra, ulang marsidalian

Domma nahatahon nongkan, lang ongga husurahon, lang ongga huparnipihon gabe Parhorja ni Kuria. Lang ongga huparleilei. Gariada, hubotoh do na lang sitiruon pardalanan ni pargoluhonku na mambahen missah ahu hun Jakarta hu Bandung.

Tapi, sonai ma gakni pardalanni. Dob manopoti ahu i Kuria Sondiraya bani ujung ni tahun 1961, lanjar tarjalo gabe Parguru Inang-i-rumahku, janah dob tardidi Inang-i-rumahku pakon dua niombahnami i Gereja Pasundan, Bandung, roh ma arah-arah ase dihut ahu mambobahon partonggoan ni halak Simalungun na baru ipungkahkon i Bandung . Lang piga tangga ope ijia halak Simalungun i Bandung (pakon Cimahi). Dong ma in na marsikolah do ase marianan i Bandung (songon Urick Damanik, Petrus Saragih). Dong na Tentara do, sanggah ipindahkon hu Bandung. Tongon, dong do na hira domma marhatotapan i Bandung (songon Pandita A.H.P. Girsang (Aner Hendrik Purba Girsang), Pandita ni GKPS na gabe Pandita Tentara; Poltak Girsang na dob gabe guru i Bandung, sonai age Jasalpen Saragih na horja i Rumah Sakit Tentara i Cimahi).

Domma dong homa ijia namaposo Simalungun marianan i Bandung. Deba sidea in domma marhorja i Bandung. Tapi bahatan ma na sanggah kuliah, songon Edison Sinaga, Nekan Sinaga, .... Purba.

Dob mardalan piga-piga dokah partonggoan nongkan, umbuk ma riah ase napungkahkon ma mambahen parmingguan ni halak Simalungun. Iporluhon ma pabangkithon Parhorja ni parmingguan in. Hira lang pala dong ibahen harungguan ni pagori laho mamilih Parhorja. Hu bani ise na ra, hujai ma iondoshon horja mambobahon parmingguan in, hasoman ni Pdt A.H.P Girsang).

Dihut ma ijia ahu na ra jadi Parhorja. Ra ma homa ijia Urick Damanik, tapi jadi Syamas dassa ra ia. Ai sanggah i Medan pe gan ia, domma guru horjani, dokah ma iarahkon ase ra ia gabe Parhorja ni Kuria, tapi lalab lang ope ra ia. Dob na i Bandung in pe ase ra ia. Anggo Poltak Girsang, dob na elek-elek ma ase saud ra dihut jadi Parhorja. Age pe domma guru ia, tapi borat pe uhurni anggo jadi Parhorja ni Kuria, halani ibotoh do na borat do jadi Parhorja ni Kuria, janah nihurni lape talup ia. Na deba nari, dong do mintor ra, dong do na palobei ielek-elek ase ra, dong do na so ra.

Anggo ahu, mintor ra do. Dihut ma gakni deba ai, halani huahapkon idop ni uhur ni Naibata do ai bakku, ra Ia mangonjapkon ahu ase dihut marhorja i KuriaNi. Gabe tanda do homa ai huahap, tanda ni na dob marpangulaki uhur ni Naibata hu bakku na magou hinan. Malas ni uhur do homa ai bakku anggo ipalar Naibata pe dihut ahu gabe Parhorja ni KuriaNi, hassi pe namin damok tumang do habotohonku pasal horja i Kuria.

Ai ma ase lang pag ahu marsidalian. Sonin iarahkon, mintor ra do ahu. Mintor dong do pos ni uhur bakku, anggo ra Naibata mamakei ahu, lang anjai lang Ipargogohi do, Ipatalup manghorjahon horja in.

Anggo marsidalian ahu, boi hinan do huparsidalian parngit ni pargoluhonnami ijia. Tongon domma marhorja ahu, ai ma Pegawai Negeri (golongan D hinan, dob ai golongan E dob dapot ahu Sarjana Muda i Fakultas Hukum, 1962). Tapi madohor satongah ni gaji do manggalar sewa ni rumah na iianhonnami i Cisitu (hubabouhon ni Simpang Dago-Siliwangi). Sambil horja do homa ahu kuliah. Ai ma ase marayak tammat kuliah, hira na paksa ma marjualan Inang-i-rumahnami, mar-‘kedai sampah’ nidokan. Sada meja do ibahen i lobei ni jandela ni rumahnami, ianan ni jualanni: sayur, ikan asin, bolasan, lassina, pnl. In ma mambahen lopas attup ni indahannami. Sipata, ahu do manjaga kodeinami on, sambil jolom buku-buku parlajaranku.

Daoh ni ianannami pe boi do namin sidalian. Ai daoh do Cisitu ianannami in hun parsikolahan na i suah ni Lapangan Merdeka, ianannami marminggu.

Bahatnari ope namin na boi bahenon gabe sidalian. Sedo sidalian tombei-tombeian. Sidalian na tarjalo uhur do. Deba ma ai pori, halani na maranggi-etek pe hanami ijia. Boi do homa naparsidalian, baru tardidi pe Inang-i-rumahku, na Islam hinan. Boi do homa halani poso pe umurhu ijia.

Tapi songon hata nongkan ma: lang huparsidalian ganupan in. Lang pag ahu marsidalian. Inang-i-rumahnami pe lang pag manlanglangi, gariada manjuljul do.

Ai ma ase boi do hatahonon, bani mungkahni, mar-‘modal’ RA do hansa ahu gabe Parhorja ni Kuria. Dob ai, lang marsidalian.

Pasal na marsidalian in, ongga do lolei ahu. Huparsidalian ma ujian doktoral sidoppakkononku manadingkon horjaku i Kuria marsabulan. Ninuhurhu, marhitei na manadingkon tokkin horja i Kuria, boi ma hupongkutkon marlajar mandompakkon ujian doktoral in. Huabeihon ma bani hasomanku sahorja manjampung horjaku i Kuria. Tarjalo uhur ni sidea do sidalianhin.

Hape, in ma dalanni ipabador Naibata ahu halani lang hujolom poltik Hata ni Naibata na manghatahon ‘Parlobei ma pindahi hanima harajaon ni Naibata ampa hapintoranni, dob ai tambahkononNi do ganupan ai bannima’, hansi pe husuratkon do namin banggal-banggal bani sada hortas folio, hulongkotkon bani dingding ni rumahnami. Ai sonin jumpah ari ni na ujian on, paksa ma borhat ahu hun rumah lang palobei manambul halani lang dong sidabuhan. Humbani piga-piga halak hanami ijia na ujian (lisan) on, tudu ma homa ibahen ahu tang parpudi, dob salpu tongah arian pe ase idilo goranku. Domma lang be tontang pangahapku. Atap na sonaha ma ai, roh ma sungkun-sungkun parlobei humbani Dosen Panguji na lang dear tarbalosi ahu. Somal do namin, roh sungkun-sungkun na paduahon humbani Dosen Panguji ase ulang soh bani sungkun-sungkun na parlobei. Hape, santorap on soh do Dosen on bani sungkun-sungkun na so tarbalosi ahu ai, lang ra ia mambahen sungkun-sungkun na legannari. Halani mago-mago sip mando ahu, nini Dosen Panguji in ma mangujungi ujian on:’Tolu bulannari ma ulakkon use roh’. Na manghatahon lape boi lulus do nidokni ai, na mararti maningon ulakanku ujian tolu bulannari.

Dob mulak ahu hu rumah, huidopkon ma bani uhurhu, hubotoh ma na dob marsalah ahu. Ai huparsidalian ujianhin manadinghon horja i Kuria.

Mandompakkon ujian si tolu bulannari nidokan in, hupongkuthon ma use marlajar. Sobali mangindahi balos tang sidearan hu bani sungkun-sungkun na so tarbalosi nongkan, huulakkon ma use manratah-ratahi na dob huparlajari hinan. Hira pongkutan ma use marlajar bani nombas si tolu bulan na paduahon on. Tapi ai ma, lang be pag ahu manadingkon horja i Kuria, tarlobih anggo marsidaliankon na laho ujian in. Hupongkuthon marlajar, hupongkuthon homa manlahoi horjaku i Kuria.

Dob lopus tolu bulan, huulakkon ma use ujian. Lang pala dong biar ni uhurhu das talu use. Lambas do ganup mardalan. Sungkun-sungkun ni Dosen Panguji pe na urah balosan do ganup. Jadi, saud ma ahu lulus ujian Doktoral nidokan, sanlangkahnari mando ase Sarjana Hukum.
Mardingat in, hunjianari lang be pag ahu marsidalian laho manlembangi horja i Kuria, tarlobih ma anggo domma ondos hinan sihorjaonkonku.